İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 373 Hüküm no: 439 Orijinal metin no: [186-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Nasuhi Efendi Zaviyesi Vakfı’ndan bakkal ve berber dükkânları ile mahzenlerin tamiri hususunda mimar tarafından keşfinin yapılması Keşif, Bahçekapısı hâricinde Üsküdar Kādısı Efendi nezâretinde olan evkāfdan bakkāl ve berber dükkânları ve mahzen. Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden keşif nâibimiz müderrisîn-i kirâmdan es-Seyyid Halil Efendi Hâssa mi‘mârlarından el-Hâc Mustafa ve Ahmed halîfeler ve sâir ümenâ-yı şer‘le mahmiye-i İslambol’da bahçekapısı hâricinde [187] Bursa Tekyesi mahâllesinde vâki‘ Üsküdar kādıları efendiler nezâretlerinde olan evkāfdan Haseki İsmail Ağa nâm sâhibü’l-hayrın medîne-i Üsküdar’da merhûm eş-Şeyh Nasuhi Efendi Zâviyesi’nde eczâ-yı şerîfe tilâvetine ve suyolları meremmâtına vakfeylediği bakkāl dükkânı ve berber dükkânı ve mahzenleri üzerine varıp huzûr-ı Müslimînde akdeylediği meclis-i şer‘-i hatîrde vakf-ı mezbûra kāimmakām-ı mütevellî olan sâhib-i arzuhâl Haseki el-Hâc Mustafa b. el-Hâc Süleyman hâlâ kāimmakām-ı mütevellîsi olduğum vakf-ı mezbûrdan icâre-i vâhide ile icâr ve iktizâ eden ta‘mîr [ve] termîmi taraf-ı vakıfdan olunagelip işbu mu‘âyene olunan kârgîr bakkāl ve berber dükkânları ve mahzenler sebkat eden zelzeleden rahnedâr ve ta‘mîre muhtâc ve üzerinde olan ahşabdan odalar ve ittisâlinde kezâlik ahşabdan mahzen münhedim ve harâb olmağla bundan akdem ma‘rifet-i şer‘-i şerîf ve mi‘mâr ağa ma‘rifetiyle muhtâc-ı ta‘mîr ve tecdîd olan mahâlleri keşf ü mu‘âyene olunup zikr olunan münhedim odalar mahâlline sakflı ve tavanlı ve tahta döşemeli ve etrâfı dolma duvar ve tahta perdeli ve sofalı ve pencereli ve dolaplı ve ocaklı ve nerdübanlı bakkāl odası ve dehliz binâ ve mevcûd kârgîr toloz ve duvarların münşak olan mahâlleri ta‘mîr ve mezkûr bakkāl ve berber dükkânlarının tavan ve döşeme ve kepenk ve sâir müştemilâtı tecdîd ve ta‘mîr ve ittisâllerinde mezkûr münhedim mahzen mahâllerine sundurma sakflı ve etrâfı taş duvarlı mahzen tecdîd ve binâ olunmak muktezî olmağla ben bi’l-izni’ş-şer‘î ber-vech-i muharrer ebniye ve meremmât-ı mezkûreyi taraf-ı vakıfda olan galle-i mevcûde yüz yetmiş altı buçuk guruş ve bakkāl dükkânı müsteciri Karacaoğlu zimmîden müşâhereten icâresine mahsûben ber-vech-i peşîn ahz eylediğim üç yüz beş guruş ve berber dükkânı müsteciri es-Seyyid İbrahim Çelebi yedinden kezâlik icâresine mahsûben ber-vech-i peşîn ahz eylediğim yüz guruş ki cem‘an beş yüz seksen bir buçuk guruşdan ziyâdeyi dahî galle-i vakfa rücû‘ şartıyla bi’l-istîzân ve’l-istidâne tahdîd ve binâ ve ta‘mîr etmemle tekrâr keşf rü’yet olunmak matlûbumdur dedikde mi‘mârân-ı merkūmân zikr olunan ebniye ve meremmâtı misâha ve tahmîn ve takvîm eylediklerinde hâlâ Ser-mi‘mârân-ı hâssa Mehmed Tahir Ağa hatemiyle mahtûm defter nâtık olduğu üzere ebniye-i mezkûre sekiz yüz üç buçuk guruş altı akçeye ile olur noksân ile olmaz deyü icmâ‘ ve ittifâk eylediklerini mezbûr dâ‘îleri mahâllinde tahrîr ve gelip inhâ eylediğini bi’l-iltimâs huzûr-ı âlîlerine i‘lâm olundu. Fî 4 min-şehr-i Rebî‘ülâhir sene 1180.