İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 375 Hüküm no: 441 Orijinal metin no: [187-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Yusuf’un, Mustafa ve Ahmed aleyhindeki Kasab dükkânı gediği davasından men olunması İbrahim Paşa Hamamı kurbünde Kasab gediği nizâ‘ı Ma‘rûz, İbrahim Paşa Hamamı kurbünde kasab gediğine mutasarrıf olan sâhib-i arzuhâl Bostanî Yusuf Acemoğlanı Meydanı’nda kasab gediğinin nısfına merhûm Kara Mustafa Paşa Vakfı tarafından bâ-temessük-i mütevellî Ahmed nâm kimesne ile iştirâken mutasarrıf olan arzuhâlde mezkûr el-Hâc Mustafa ile terâfu‘larında benim mutasarrıf olduğum gedik ile mezbûr el-Hâc Mustafa’nın ve şerîki Ahmed’in tasarruflarında olan gedik mukaddemâ hizmetinde olduğum Molla Ali’nin tasarrufunda iken altmış sekiz senesinde fevt oldukda yirmi dört akçe mukābelesinde kasabbaşı ve ustaları ma‘rifetleriyle taraf-ı vakıfdan bana verilip mezbûrân yedlerinde olan gediği dahi mezbûr Molla Ali’nin celeb tâifesine olan deynini malımdan vermek şartıyla ol vakitde kasabbaşı ustaları va‘ad etmeleriyle ben dahi malımdan müteveffâ-yı mezbûrun yetmiş dokuz bin akçe deynini edâ etmiş iken bana verilmeyip Uzun Halil’indir deyü eş-Şeyh Hasan nâm kimesneye ondan İsmail Ali’ye onlardan dahi Hüseyin ve es-Seyyid Mustafa’ya ve Hüseyin’den dahi işbu mezbûr el-Hâc Mustafa’ya verilip ve defter-i vakıfda dahi mezbûrândan Halil’e ne vechile [188] geçdiği mukayyed olmamağla taleb ederim deyü da‘vâ edip lâkin hasm-ı şer‘î olmayıp hak taleb olmadığından mâ‘adâ mezbûr Yusuf hâlâ Sadr-ı rum fazîletlü semâhatlü efendi hazretleri yetmiş dört senesinde İslambol kādısı iken husûs-ı mezkûru mukaddemâ gediğe mutasarrıf olan mezbûr es-Seyyid Mustafa’dan da‘vâ ve kezâlik da‘vâsı mesmû‘a olmadığı i‘lâm olunup ve sened ittihâz eylediği mezbûr Molla Ali’nin terekesi defterine nazar olundukda tereke ve zimemi düyûnunu muhît olup mezbûr Yusuf’u mükezzib olmağla husûs-ı mezkûr için mezbûr Bostanî Yusuf şer‘an mu‘ârazadan men‘ olunmak iktizâ eylediği huzûr-ı âlîlerine i‘lâm olundu. Fî 27 Cumâdelûlâ sene 1180.