İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 375 Hüküm no: 442 Orijinal metin no: [188-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermiya’nın, kayınbiraderi Kerih aleyhindeki alacak iddiasının uydurma ihtimali olması Beşyüz doksan guruş mukaddemâ altmış guruşa sulh olup şimdi inkâr etmekle i‘lâm. Ma‘rûz, Avratpazarı’nda attâr arzuhâl eden Ermiya meclis-i şer‘-i hatîrde kaynı Kerih v. Atan muvâcehesinde yedimde olan temessük mantûkunca işbu seksen senesi Rebî‘ülevveli’nin on ikinci günü kendi dükkânımda malımdan sâfî beyaz akçe iki bin dört yüz otuz üç guruş kaynım merkūm Kerih’e ikrâr ve teslîm, ol dahi kabz ve istihlâk etmekle taleb ederim deyü ba‘de’d-da‘vâ ve’l-inkâr ve isr-i talebü’l-beyyine müdde‘î-i merkūm şâhid ikāmetinden izhâr-ı acz ile yemîn vermeğe tâlib olmağla merkūm Kerih dahi tahlîf olundukdan sonra müdde‘î-i merkūm meblağ-ı merkūmu şehr-i merkūmun yirmi sekizinci günü vermişdim deyüp ve şehr-i merkūmun yirmi üçüncü günü merkūm Kerih’den Mahmudpaşa mahkemesinde beş yüz doksan guruş da‘vâ ve altmış guruş bedel-i makbûz mukābelesinde sulh ve âmme-i da‘vâdan zimmetini ibrâ eylediğini nâtık merkūm Kerih yedinde olan i‘lâmın mazmûnunu merkūm Ermiya ikrâr etmekle husûs-ı merkūmda tezvîr fehim olunduğu bi’l-iltimâs huzûr-ı âlîlerine i‘lâm olundu. Fî 27 min-Cumâdelûlâ sene 1180.