İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 378 Hüküm no: 448 Orijinal metin no: [189-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya Vakfından olup deprem nedeniyle yıkılan ve sahipleri tarafından yeniden inşa edilen dükkânların kirası hususunda eski kiracıların taleplerinin uygun olmadığı Balıkpazarı’nda berber ve attâr dükkân gediği nizâ‘ı Ma‘rûz, Balıkpazarı’nda Peynirciler sokağında gedik sâhiblerinden Beşiktaşlı Berber Mehmed’in evlâd-ı sıgārı Mehmed ve Emine’nin vasiyy-i muhtârları arzuhâl eden diğer Mehmed ve Attâr Yusuf’un oğlu İsmail ve yine Attâr Mehmed ve İbrahim ve Berber Yuvan ve Yanaki’den her biri Ayasofya Vakfı’ndan altı bâb dükkâna iştirâken mutasarrıfe olan Hayrunnisa nâm hatunun vekîli arzuhâlde mezkûr Numan Efendi ile mezbûrenin karındaşı Mehmed Tahir’den biz üçer guruş kirâ ile dekâkîn-i mezkûrede ba‘zımız on ve ba‘zımız yirmi seneden beri müşâhereten müstecirler iken ve her birimiz gediğimizi ikişer ve üçer yüz guruşa iştirâ ve dükkânımız masârıf-ı lâzımesine mezbûr Mehmed Tahir’in emriyle ma‘lûmü’l-mikdâr akçe sarf etmiş iken zelzeleden harâb oldukda ta‘mîr bahânesiyle bizi ihrâç etmekle yine bize icâr eylesinler deyü eyledikleri da‘vâları şer‘an mesmû‘a olmayıp lâkin mezbûrân Numan Efendi ve Mehmed Tahir merhameten zikr olunan berber dükkânı ile attâr dükkânını vasiyy-i mezbûr ile mezbûr İsmail’e icâr onlar dahi isticâr ve kat‘-ı nizâ‘ edip ve mâ‘adâ mezbûrûnun masârıf iddi‘âlarında dahi mezbûr Mehmed Tahir’in emrinde rücû‘ şartı olmamağla mücerred emriyle mezbûr Mehmed Tahir’den şer‘an nesne lâzım gelmediği imtisâlen li’l-emri’l-âlî huzûr-ı âlîlerine i‘lâm olundu. Fî-selhi Cumâdelûlâ sene 1180.