İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 379 Hüküm no: 449 Orijinal metin no: [190-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ferhad Mescidi Vakfı Mütevellisi İbrahim’in Şeyhülislam Ebu İshak İsmail Efendi Vakfı mütevellisi aleyhindeki han davasının reddedilmesi el-Hâc Ferhad Mescidi Vakfı mütevellîsi Hacı İbrahim Han nizâ‘ı Ma‘rûz, Sâdır olan fermân-ı âlîlerine imtisâlen dâ‘îhânede Haremeyn-i muhteremeyn Müfettişi müderrisîn-i kirâmdan Ahmed Necib Efendi dâ‘îleriyle akdolunan meclis-i şer‘-i hatîrde Dârüssa‘âdeti’ş-şerîfe Ağası nezâretlerinde olan evkāfdan Şeyhülislâm-ı esbak merhûm Ebu İshak İsmail Efendi Vakfı’nın mütevellîsi olan mevâlî-i izâmdan sâbıkā Mekke-i mükerreme kādısı Şerîf Yahya Efendi dâ‘îlerinin tarafından vekîl-i sâbitü’l-vekâlesi arzuhâl eden Câbî Ali Efendi nezâret-i dâ‘îlerinde olan evkāfdan el-Hâc Ferhad Mescidi Vakfı mütevellîsi el-Hâc İbrahim ile Yeni Odalar başında Mustafa Bey mahâllesinde vâki‘ etrâf-ı erba‘ası iplikçi dükkânı ve Sultân Odaları ve dülger odaları ve tarîk-i âm ile mahdûd dükkânlar ve üzerinde odaları olan hanın bi’l-icâreteyn müsteciri derûn-ı arzuhâlde mezkûr el-Hâc Süleyman hâzır olduğu hâlde terâfu‘larında han-ı mahdûd-ı mezkûr el-Hâc Ferhad Vakfı tarafından merhûm-ı müşârün-ileyhin bi’l-icâreteyn tasarrufunda iken bin yüz otuz altı târîhinde İslambol kādısı Sun‘-ı hindî? imzâsıyla mümzât yedinde olan hüccet-i şer‘iyye mantûkunca bi’l-külliye harâb olup ta‘mîr ile kābil-i süknâ ve bir vechile intifâ‘ mümkün olmayıp müceddeden binâ masârıf-ı kesîreye muhtâc olmağla taraf-ı vakıfda dahi müsâ‘ade olmayıp ve müşârün-ileyh dahi mu‘accelesine mahsûben binâdan ibâ edip ve mu‘accelesine mahsûben binâ ve rağbet eder kimesne bulunmamağla hükm-i nıkzında olan ebniye-i atikasının ba‘de’l-keşf kıymeti cânib-i vakfa edâ edip mukāta‘a-i misliyesiyle arsa-i mezkûre üzerine mülkiyet üzere binâya tâlib olmağla bu sûretde intifâ‘ munkatı‘ olmayıp vakfa enfa‘ olmağla her şehr yüz yirmişer akçe mukāta‘a-i misliyesiyle nef‘an li’l-vakf ol târîhde mütevellîsi olan Ahmed Efendi b. Hasan merhûm-ı müşârün-ileyhe izin vermekle ol dahi ebniye-i mevcûdesini binâ ve kendi vakfına ilhâk ve idrâc edip târîh-i mezkûrdan beri kırk dört sene bu vechile amel olunagelmiş iken şimdi mezbûr el-Hâc İbrahim ebniye-i mezkûreye müdâhale eder deyü da‘vâ, ol dahi cevâbında hakīkat-i hâl minvâl-i meşrûh üzere olduğunu ikrâr, lâkin harîk-i kebîrde ebniye-i mezkûre muhterike olup ol vakitde müstecir olan es-Seyyid Mehmed ebniye-i mevcûdeyi benim mütevellîsi olduğum el-Hâc Ferhad Vakfı’na teberru‘an binâ etmiş idi deyüp, lâkin ba‘de’l-harîk ebniye-i sâbıkāsı bi’l-külliye muhterike olmayıp eser-i binâ mevcûd olduğunu mukır olmağla vâkıf-ı müşârün-ileyhin ber-vech-i meşrûh mülk-i sahîhi olup vakfeylediği ebniyenin âsâr ve enkāzıyla arsa-i mezkûre meşgūle iken arsa mütevellîsi mezbûr el-Hâc İbrahim’in da‘vâsı sahîha olmadığı huzûr-ı âlîlerine i‘lâm olundu. Fî 3 C sene 1180.