İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 381 Hüküm no: 452 Orijinal metin no: [191-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin, Mustafa Odabaşı ve eşi Fatıma aleyhindeki menzil şikâyetinde anlaşma sağlanması Çınar kurbünde Sancakdâr Hayreddin mahâllesinde Çavuşbaşı Hüseyin Ağa Vakfı’ndan keşf-i menzil Ma‘rûz, Sâdır olan fermân-ı âlîlerine imtisâlen taraf-ı dâ‘îlerinden irsâl olunan es-Seyyid Mehmed Efendi ve Haremeyn müfettişi efendi dâ‘îleri tarafından mürsel es-Seyyid el-Hâc Mehmed Efendi hâssa mi‘mârlarından Ahmed ve Mustafa Halîfeler ile mahmiye-i İstanbul’da Çınar kurbünde Sancakdâr Hayreddin mahâllesinde vâki‘ nezâret-i dâ‘îlerinde olan evkāfdan Çavuşbaşı Hüseyin Ağa Vakfı’ndan sâhib-i arzuhâl Hasan Efendi b. Ali’nin mutasarrıf olduğu menzile varıp huzûr-ı Müslimînde akdeyledikleri meclis-i şer‘-i şerîfde mezbûr Hasan Efendi menzil-i mezkûru ittisâlinde kâin Haremeyn-i muhteremeyn Vakfı’ndan bir bâb menzile mutasarrıfân olan arzuhâlde mezkûreyi’l-ism Mustafa Odabaşı b. Hüseyin ve zevcesi mu‘arrefetü’z-zât Fâtıma Hatun bt. İsmail muvâcehelerinde Hüseyin Ağa Vakfı mütevellîsi Abdi Ağa ve Haremeyn-i muhteremeyn Vakfı mütevellîsi tarafından câbî-i vakf Hasan Halîfe hâzırân oldukları hâlde terâfu‘larında işbu derûnunda akd-i meclis-i şer‘-i kavîm olunan menzilim müştemilâtından olup mi‘mârân-ı merkūmân misâhaları üzere tûlen beş zirâ‘ ve arzen on beş parmak damlalık arsamı mezbûrân fuzûlî zabt ve üzerine kadden dokuz zirâ‘ matbâh ocağı ihdâsıyla menzilim odası ocağı derûnu vehn gelip sıvaları münhedim olduğundan mâ‘adâ zikr olunan ocak tarafından hamam ve külhan ve kenîf binâsına mübâşeret eylemeleriyle zikr olunan damlalık arsamdan kasr-ı yedlerine ve fuzûlî ihdâs eyledikleri ocağın kal‘ına ve tarafeynden binâsına mübâşeret eyledikleri hamam ve külhan ve kenîf binâsından keff-i yedlerine tenbîh olunmak matlûbumdur deyü ba‘de’d-da‘vâ ve’l-mu‘âyene ve’l-ikrâr bâ-tavassut-ı muslihîn müdde‘î-i mezbûr Hasan Efendi’nin rızâsıyla sâlifü’l-beyan ocak ebniyesi kal‘ı da‘vâsından fâriğ olup ve mezbûrân Mustafa Odabaşı ve zevcesi Fâtıma Hatun mezkûr ocak tarafına hamam ve külhan ve kenîf binâ etmeyip ancak zarârı olmaksızın bir tarafına mağsel binâ ve bir tarafına dolap vaz‘ ve kenîfi mukaddemâ yine kenîf olan mahâlle nakil ve binâ etmek üzere beynleri tevfîk olunup ve mütevellîleri dahi bu minvâl üzere re’y etdiklerinden sonra mezbûr Hasan Efendi’nin ber-vech-i muharrer menzilinin ocağı derûnunda münhedim ve harâb olan mahâlleri mezbûrân rızâlarıyla kendi mallarından ta‘mîr ve binâya ta‘ahhüd ve bu vechile kat‘-ı nizâ‘ eyledikleri ba‘de’l-inhâ huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 25 Ca sene [1]180.