İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 382 Hüküm no: 453 Orijinal metin no: [191-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’a kira bedelinden olan borcunu ödemesi hususunda Abdullah b. Ali’ye tenbihte bulunulması Esirpazarı’nda oda kirâsından da‘vâ 360 [guruş] Ma‘rûz, Zâtı mu‘arrefe arzuhâl eden Fâtıma bt. Hasan Çarşamba arz odasında huzûr-ı âlîlerinde ma‘kūd meclis-i şer‘-i şerîfde Esirpazarı’nda fevkānî ve tahtânî iki bâb odası olan derûn-ı arzuhâlde mezkûr Abdullah b. Ali mahzarında mezbûr Abdullah’dan zikr olunan odaları her şehr onar guruş kirâ ile isticâr ve üç yıllık mecmû‘ kirâsını geçen sene Zilka‘desi’nin on beşinci günü Kadırga Limanı’nda Taşdirekler yanında üç yüz altmış guruş verip ol dahi kabz etmiş iken mezbûr Abdullah sâlifü’z-zikr odaları bana zabt etdirmemekle meblağ-ı merkūmu istirdâd ederim deyü [ba‘de’]d-da‘vâ ve’l-inkâr müdde‘iye-i mezbûre müdde‘âsına Odabaşı Çarşısı’nda Şerbetçi es-Seyyid Mustafa b. İbrahim ve yine mahâll-i mezkûrda Tarhanacı Süleyman b. Hüseyin nâm kimesneleri ikāme, onlar dahi edâ-yı şehâdet edip ba‘de’t-ta‘dîl tezkiyeleri için kıbel-i şer‘-i şerîfden Emin Efendi dâ‘îleri irsâl ol dahi Odabaşı Çarşısı’na varıp mezbûrânı tezkiye eyledikde mezbûr es-Seyyid Mustafa’nın udûlden olduğunu ihbâr ve mezbûr Süleyman fi’l-asl Kasımpaşa’da sâkin olup mahâll-i mezkûra geleli beş ay olup ahvâlini bilir kimesne olmamağla [192] tekrâr Kasımpaşa’da sâkin olduğu mahâlle varıp tezkiye eylediklerinde onun dahi udûlden olduğunu ihbâr etmeleriyle şehâdetleri makbûle olmağın mûcebiyle meblağ-ı mezkûr üç yüz altmış guruşun edâsına mezbûr Abdullah’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 6 Cumâdelâhire sene 1180.