İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 383 Hüküm no: 454 Orijinal metin no: [192-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun Vakfı’ndan Takyeciler mahallesinde Hanife Hatun ile Ümmügülsüm Hatun’un tasarruflarında olan menzil ve arsanın ifraz ve taksim olunması Otakçılar nâm mahâlde Fâtıma Hatun Vakfı’ndan keşf-i menzil Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Mustafa Halîfe ile nezâret-i dâ‘îlerinde olan evkāfdan Eğrikapı dâhilinde kâin Molla Aşkī Câmi‘-i şerîfinde minber ve kürsü vaz‘ eden Fâtıma Hatun Vakfı’ndan medîne-i Ebâ Eyyûb Ensârî -aleyhi rıdvânü’l-bârîde- Otakçılar kurbünde Takyeci mahâllesinde vâki‘ bir tarafı Mustafa Ağa ve Salih Ağa menzili ve bir tarafı ba‘zan es-Seyyid Ali Ağa ve ba‘zan Za‘îm Mehmed Ağa menzilleri ve bir tarafı Defterdâr İskelesi’ne müntehî tarîk-i âm ve bir tarafı makābir-i Müslimîn tarafında olan tarîk-i âm ile mahdûd zikri âtî menzile varıp huzûr-ı Müslimînde akdeylediği meclis-i şer‘-i şerîf-i enverde sâhibe-i arzuhâl Hanife Hatun bt. Mustafa arzuhâlde mezkûre Ümmügülsüm Hatun bt. Ali muvâcehesinde vakf-ı mezbûr mütevellîsi tarafından vekîli ve oğlu es-Seyyid Mehmed Emin hâzır olduğu hâlde terâfu‘larında işbu mu‘âyene olunan menzil-i mezkûrun beher şehr yedişer akçe icâre-i müeccele ile sülüs şâyi‘i benim ve on dörder akçe icâre ile sülüsân şâyi‘i mezbûre Ümmügülsüm’ün olmağla ifrâz ve ta‘yîn olunmak matlûbumdur dedikde mi‘mâr-ı merkūm li-ecli’t-taksîm misâha ve tahmîn ve takvîm eyledikde es-Seyyid Ali ve Za‘îm Mehmed Ağa ve Mustafa oğlu Salih Ağa menzilleri ve makābir-i Müslimîn tarîk-i âmmı taraflarından terbî‘an otuz dört zirâ‘ ve altı parmak arsa üzerinde mebnâ yüz otuz yedi guruş kıymetli fevkānî bir bâb oda ve tahtânî’de kenîf ve yine terbî‘an otuz dört zirâ‘ arsa üzerinde mebnâ on yedi guruş kıymetli sundurma dükkân mahâlli sakflı ve binâlı ve binâsız iki yüz yetmiş sekiz zirâ‘ zemîn-i mezbûre Hanife Hatun’un sülüs hissesi için alâmât-ı fâsıla vaz‘ıyla bi’t-terâzî ifrâz ve ta‘yîn ve tahsîs ve Mustafa Ağa ve Salih Ağa menzili ve es-Seyyid Ali Ağa menzili ve Defterdâr İskelesi tarîki taraflarından terbî‘an yüz otuz altı buçuk zirâ‘ arsa üzerinde mebnâ beş yüz kırk altı guruş kıymetli fevkānî iki bâb oda ve dehliz ve tahtında bir sagīr oda ve kırk zirâ‘ on altı parmak arsa üzerinde mebnâ yüz bir buçuk guruş kıymetli kebîr kemer ocağı matbâh ve yirmi beş guruş kıymetli su kuyusu ve binâlı ve binâsız iki yüz sekiz zirâ‘ arsa mezbûre Ümmügülsüm’ün sülüsân hissesi için kezâlik ifrâz ve ta‘yîn olundukda bâ-re’y-i mütevellî her biri hisse-i müfreze-i mezkûrelerini ahz ve kabûl ve istifâ-yı hakkı ikrâr ve bu vechile kat‘-ı nizâ‘ eyledikleri ba‘de’l-inhâ huzûr-ı âlîlerine i‘lâm olundu. Fî 2 min-Cumâdelâhire sene 1180.