İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 384 Hüküm no: 455 Orijinal metin no: [192-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın menzilinde ilave etmiş olduğu mahallin Mehmed Haşim’in menziline zararı olduğundan yıkılması Keşif, Uzunçarşı kurbünde Bezzâz-ı cedîd mahâllesinde menzil. Ma‘rûz, Sâdır olan fermân-ı âlîlerine imtisâlen cânib-i şer‘-i şerîfden irsâl olunan Numan Efendi Hâssa mi‘mârlarından Ebubekir ve Mustafa halîfeler ile mahmiye-i İstanbul’da nezâret-i dâ‘îlerinde olan evkāfdan merhûm Cebecibaşı Vakfı’ndan Uzunçarşı kurbünde Bezzâz-ı cedîd mahâllesinde tarîk-i hâsda vâki‘ bir bâb menzile bi’l-icâreteyn mutasarrıfe olan mu‘arrefetü’z-zât Âişe Hatun bt. Abdullah’ın menziline varıp huzûr-ı Müslimînde akdeylediği meclis-i şer‘-i hatîrde sâhib-i arzuhâl es-Seyyid Mehmed Haşim mezbûre Âişe Hatun ile terâfu‘larında mezbûre Âişe Hatun üç gün mukaddem işbu derûn-ı akd-i meclis-i şer‘-i şerîf olunan menzilinin sakfı üzerine müceddeden binâ ve ihdâs eylediği tahte’s-semâdan benim makarr-ı nisvân olan mevâzi‘ine nezâret ve zarârı mübeyyen olmağla def‘ eylesin deyü da‘vâ etdikde mezbûre Âişe dahi târîh-i mezbûrede ihdâs eylediğini ba‘de’l-ikrâr mi‘mârân-ı merkūmân mezkûr tahte’s-semâya nazar ve mu‘âyene eylediklerinde ber-vech-i muharrer nezâret ve zarâr-ı mübeyyeni olduğundan mâ‘adâ bâ-fermân-ı âlî memnû‘âtdan olan ebniyeden olduğunu haber verdiklerini mezbûr dâ‘îleri mahâllinde ba‘de’t-tahrîr gelip inhâ eylediği huzûr-ı âlîlerine i‘lâm olundu. Fî 17 Rebî‘ülevvel sene 1180.