İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 385 Hüküm no: 457 Orijinal metin no: [193-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İsmail’in tasarrufunda olan menzilin Nergis Hatun Vakfı’ndan icareteynli olduğunun tescili Nergis Hatun Vakfı’ndan menzil Ma‘rûz, Nezâret-i dâ‘îlerinde olan evkāfdan Üskübî kurbünde Muhyiddin Foçavî mahâllesinde vâki‘ Nergis Hatun Vakfı’ndan etrâf-ı erba‘ası Bekir Bey ve Emine ve Havva Hatun menzilleri ve tarîk-i âm ile mahdûd menzile mutasarrıf iken bundan akdem fevt olan Navulcu el-Hâc İsmail’in veresesi li-ebeveyn kız karındaşı arzuhâlde mezkûre mezbûre Havva tarafından vech-i âtî üzere da‘vâ ve ikrâra vekîli olduğu zâtını ârifân kısmet-i askeriye muhzırı el-Hâc Ahmed b. Abdullah ve Hâfız İsmail Efendi b. Mustafa şehâdetleriyle sâbit olan kızı Zeyneb bt. İsmail meclis-i şer‘-i şerîfde vakf-ı mezbûr mütevellîsi arzuhâl eden İmam Mehmed Efendi mahzarında menzil-i mezkûrun arsası vakf-ı mezkûrdan müvekkilem mezbûre Havva’nın mûrisi müteveffâ-yı mezbûrun tasarrufunda ve ebniyesi on bir sene mukaddem vâki‘ olan Cibâli harîkinde muhterike oldukda hâlâ mevcûde olan müştemilâtını müteveffâ-yı mezbûr mülkü olmak üzere nefsi için binâ edip müvekkilem mezbûreye mevrûs olmuş idi deyü da‘vâya tasaddî ve mütevellî-yi mezbûr dahi vakfa teberru‘an binâyı ikrâr etmiş idi deyü nizâ‘ etmeleriyle mütevellî-yi mezbûr nef‘an li’l-vakf mezbûre Havva için vekîl-i mezbûreye yüz guruş verip ve da‘vâsından mezbûre Havva’nın zimmetini ibrâ etdikde ol dahi meblağ-ı merkūm yüz guruşu müvekkilesi mezbûre için ahz u kabz edip menzil-i mezkûrun arsa ve ebniye-i mevcûdesi Nergis Hatun Vakfı olup cânib-i vakf-ı mezkûrdan bi’l-icâreteyn mûrisi müteveffâ-yı mezbûr el-Hâc İsmail’in taht-ı icâresinde olduğunu bi’l-vekâlet ikrâr ve kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 6 C sene 1180.