İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 386 Hüküm no: 458 Orijinal metin no: [193-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocabaşı İlya’nın vergi davasının reddedilmesi ve aldığı paranın iadesi Hukūk, 250 [guruş] Ma‘rûz, Debre kazâsına tâbi‘ Herile? nâm karye ahâlîsinin mukaddemâ kocabaşısı olup hâlâ mahmiye-i İslambol’da mütemekkin İlya v. Narin zimmî mahmiye-i mezbûrede meclis-i şer‘-i şerîfde ahâlî-i mezbûreden Sorhin v. Laren zimmîden [194] üç karındaş olup karye-i mezbûrede <> menzilleri ve tarlaları var iken on iki seneden beri İslambol’da kendi kârıyla meşgūl ve sinîn-i mezkûrede karye-i mezbûre salyânesinden hisselerine üç yüz elli guruş isâbet etmekle tahsîldâr olan Terzi Bektaş Beşe mecmû‘unu merkūmdan mutâlebe etdikde ben edâsına işbu yedimde olan hüccet mantûkunca emriyle kefil olup hattâ bundan akdem merkūm meblağ-ı mezkûr için Patrikhâne’sinde yemîn etmemekle Balat Mahkemesi’ne getirip meblağ-ı mezkûru karzdan olmak üzere ben da‘vâ ve işbu yedimde olan i‘lâm nâtık olduğu vech üzere karz olduğunu iki şâhid ile isbât etdikden sonra yüz guruşunu yedinden ahz ve bâkī iki yüz elli guruşu taleb ederim deyü da‘vâ etmekle evvelen yedinde olan hüccete nazar olundukda ancak kefâlet-i meşrûhasını nâtık olup ve sâniyen i‘lâma nazar olundukda meblağ-ı mezkûru karzdan da‘vâ ve isbât eylediği tasrîh olunmağla müdde‘î-i merkūmun takrîrinin hilâfı olup ve salyâne-i mezkûre tahsîn-i emlâk yâhud ebdân için olduğunu beyan etmeyip ciheti mechûle olmağın düyûn-ı sahîhadan olmamağla kefâlet dahi meşrû‘a olmadığından mâ‘adâ kefil, mekfûlün-bihâ[yı] edâ etmedikçe mekfûlün-anha rücû‘u mesmû‘a olmayıp müdde‘î-i merkūmun vech-i meşrûh üzere aldığı yüz guruşun dahi şer‘an reddi iktizâ eylediği mübâşiri çavuş kulları iltimâsıyla huzûr-ı âlîlerine [i‘lâm olundu]. Fî 11 C sene 1180.