İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 403 Hüküm no: 490 Orijinal metin no: [205-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gelen arpanın Kapan-ı dakik’de kimlere ne kadar verildiğini kayıt altına alınması Ma‘rûz, Mahmiye-i İslambol suru hâricinde ve Boğaziçi’nde vâki‘ Arpacılar kapandan ziyâde arpa alıp ve taşra etrâf kurâya ziyâde baha ile fürûht ve içlerinden ba‘zıları ihtikâr etmeleriyle Âsitâne’de arpanın kılletine ve bahasının tezâyüdüne bâ‘isdir deyü kapan arpacılarının inhâlarıyla sâdır olan fermân-ı âlîlerine imtisâlen mahâll-i mezbûreye kifâyet eden şa‘irin mikdârını [ta‘yîn] için Kapan nâibi dâ‘îleri ve Kapan tüccârı ve Arpacı esnâfı ma‘rifet ve ittifâklarıyla rü’yet olundukda mavna ile Kapan’dan götürüp telef olmak ihtimâli gālib olan mahâllerden nefs-i Üsküdar’da vâki‘ on dokuz aded arpa sergileri ashâbına senede doksan bin ve Beykoz’da vâki‘ bir aded arpa sergisine on sekiz bin ve Tophane’de beş aded arpacı sergisine sergiler ashâbına on dokuzbin sekiz yüz yirmi ve Kasımpaşa’da vâki‘ bir aded arpacı sergisine üç bin altı yüz ve Defterdâr İskelesi’nde iki aded arpacı sergisine yedi bin ikiyüz ve Samatya iskelesinde vâki‘ iki aded arpacı sergisine bin iki yüz ve Davudpaşa İskelesi dâhilinde vâki‘ on üç aded arpacı sergisine on bin sekiz yüz ve Langa Yenikapısı dâhilinde bir aded arpa sergisine beş bin dört yüz ve Kumkapı hâricinde vâki‘ üç aded arpacı sergilerine onsekiz bin keyl ki cem‘an bir yük seksen bin yirmi keyl şa‘îre bâliğ olup mâ‘adâsı kapan-ı dakīk kurbünde ve Hasır İskelesi’nde ve Bahçekapısı’nda olan sergilere ve fermân-ı âlîşân ile ta‘yîn olunan mahâllere ve sâir lâzım olan ibâdullaha fürûht olunagelip ve gemiler inkıtâ‘ında sergi ashâbı der-mahzen etdikleri şa‘îri onu on beş ve dahi ziyâdeye fürûht âdetleri olup bi-temşiyetillâhi te‘âlâ bundan böyle şa‘îrin sefînelerin fürûht olunduğu fiât Kapan-ı dakīk’de zabt ve her kim ne kadar şa‘îr alır ise onu dahi kayd ve işbu Üsküdar ve sâir mezkûr taşra iskeleler ashâbı vech-i meşrûh üzere bir senelik şa‘îrini aldıkdan sonra sene-i mezbûre dâhilinde gelen şa‘îrden iştirâsına müsâ‘ade olunmayıp bu vechile nizâma rabt olunur ise gelen şa‘îri telef ve izâ‘atdan sıyânet ve hadd-i i‘tidâli tecâvüz eder ise fiâtı mazbût olduğundan muâhazeye miknet hâsıla olmağla nizâm-ı beldeye evfak emr-i müstahsen olması melhûz olduğu huzûr-ı âlîlerine i‘lâm olundu. Fî 27 Cemâziyelâhire sene [1]180.