İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 406 Hüküm no: 493 Orijinal metin no: [208-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devlete ve tüccara olan borçlarını vermemek için firar eden İstefan ve Kalos’un değirmen ve fırınının ihale olunması Balatkapısı dâhilinde Kebecioğlu değirmencisi firâr edip yerine kayyım nasb ve âhara fürûht Ma‘rûz, Âsitâne-i aliyye’de ekmekçi esnâfı vakit ve zamânında altı aylık zahîre der-anbar ve narh-ı rûzî üzere tâmmü’l-vezn hâs ve beyaz tabhı nisâbında nân-ı azîz işleyip ve mutasarrıf oldukları fırınlarını kapamamak ve Kapan tüccârından aldıkları zahîrenin akçesini edâda cefâ ve te’hîr etmemek nizâm-ı kadîmlerinden olup ve bu nizâm üzere hareket etmeyenlerin fırın ve değirmen ve gedikleri âhara verilmek nizâmlarından iken İstanbul’da Odunkapısı’nda ekmekçi olan İstefan ve Kalos veledey-i Yonan aldıkları hınta semeninden cânib-i mîrîye ve Kapan tüccârına olan deynlerini edâ etmemek için fırın-ı merkūmu kapayıp firâr ve gaybet-i munkatı‘a ile gāib olup ol vechile fırın-ı mezkûr kapalı Balatkapısı dâhilinde vâki‘ Kebecioğlu Değirmeni demekle ma‘rûf değirmeni müddet-i vâfireden beri mu‘attal kalmağla fırın-ı mezkûrda ve değirmeninde mevcûd olan mütesâri‘ü’l-fesâd hıntası ve gedik ta‘bîr olunur on horosun âlât-ı lâzıme-i ma‘lûmesi ba[r]girleriyle semen-i misillerine bey‘ olunmak için kayyım nasb olunan kethüdâları el-Hâc Mehmed Emin b. el-Hâc Ömer’i üzerine nâzır nasb olunan Turasanoğlu el-Hâc Hüseyin b. el-Hâc Ali ma‘rifetleriyle zikr olunan hıntası ve değirmen-i mezkûrda ba‘de’l-keyl ve’t-takvîm ve bargirleri âlâtlarına kapan-ı dakīkde müzâyede olundukda beher re’si yüz elli birer guruşda ve mecmû‘ zahîresi altı yüz otuz beş guruşda vech-i meşrûh üzere fırın ve değirmeni idâreye kādir idüğü ihbâr ve idâre etmek üzere esnâfından mu‘temed ve mütemevvil Agob v. Markos ve Bedros v. Artin ve Markos v. Sabin kefil olan yine esnâf-ı mezkûreden Serkiz ve Arakil ve Kirkor ve Mardıros üzerlerinde karâr ve ziyâdeye tâlibi olmayıp ve el-yevm semen-i misli olduğu ihbâr olunmağla kayyım-ı mezbûr dahi fırın-ı merkūm ve değirmen-i mezkûrun zahîre ve âlâtı olan on iki bargirleri yirmi yedi sehim i‘tibârıyla altı sehmini merkūm Serkiz’e ve on iki sehmini merkūm Arakil’e ve yine altı sehmini merkūm Kirkor’a ve üç sehmini merkūm Mardıros’a semen-i mezkûre şâyi‘an bey‘ ve teslîm, onlar dahi ba‘de’l-iştirâ ve’l-kabûl fermân-ı âlî ve nizâm-ı kadîm üzere harekete ta‘ahhüd edip ve fî-mâ-ba‘d firâr eden mesfûrûn zuhûr ve gedik da‘vâ ederlerse esnâf-ı mezkûreye idhâl olunmayıp ısrâr ederse kal‘a-bend ve haps te’dîb olunmak ve bu minvâl üzere Başmuhâsebe’ye kayd için i‘lâm olunmak şurût-ı nizâmlarından olup i‘lâm olunagelmekle vâki‘ hâl huzûr-ı âlîlerine i‘lâm olundu. Fî 16 min-Şevvâl sene 1179.