İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 60 Hüküm no: 15 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baron v. Ağya’nın Şeyhferhad mahallesindeki evini Meryem Ana Kilisesi Vakfı’na bin beş yüz kuruşa sattığı Mahmiye-i İslambol’da Şeyhferhad mahallesinde mütemekkin Baron v. Ağya nâm zimmî meclis-i şer‘-i şerîf-i enverde mahmiye-i mezbûrede Cerrâh İshak mahallesinde vâki‘ Meryem Ana Kenîsesi avârız vakfının mütevellîsi ve hâsıla olan gallesinin ziyâ‘ ihtimâline binâen akāra tebdîline me’zûn olan işbu bâ‘isü’r-rakīm Zeyreklioğlu Agop v. Melkon nâm zimmî muvâcehesinde ikrâr-ı tâm ve takrîr-i kelâm edip [6a] akd-i âti’z-zikrin sudûruna değin bâ-hüccet-i şer‘iye yedimde mülküm mârrü’z-zikr Şeyhferhad mahallesinde vâki‘ bir tarafdan Tavukçuoğlu Sahak zimmî menzili ve bir tarafdan Saltana Nasrâniye menzili ve bir tarafdan Mazlum Kigork zimmî menzili ve bir tarafdan tarîk-i âm ile mahdûd terbî‘an yüz otuz sekiz zirâ‘ arsada mebnî sokak tarafında fevkānî bir bâb oda ve bir sofa ve bahçe tarafında fevkānî üç bâb oda ve tahtında kenîf ve bi’r-i mâ ve bir zîr-i zemîn mahzen ve bir mikdâr bahçe ve havluyu müştemil bir bâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî şürût-ı müfsideden arî bey‘-ı bâtt-ı sahîh-i şer‘î ile vakf-ı mezbûr için mütevellî-i mersûm Agop zimmîye bin beş yüz guruşa bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezkûrun üç yüz guruşunu galle-i vakf-ı mezbûrdan mütevellî-i mersûm Agop yedinden ahz u kabz edip menzil-i mezkûr vakf-ı merkūm müstegallâtından oldukdan sonra mütevellî-i mersûm Agop zimmî bir kıt‘a temessük mantûkunca menzil-i mezkûru fâriğan ani’ş-şevâgil bin iki yüz guruş icâre-i mu‘accele ve yevmî iki akçe icâre-i müeccele cânib-i vakıfdan bi’t-tevliye bana îcâr ve teslîm ve semenden bâkī bin iki yüz guruşu icâre-i mu‘accele-i mezkûre bin iki yüz guruşa takās ve mahsûb eyledikde ben dahi ber-vech-i muharrer istîcâr ve tesellüm ve mukāssa ve kabûl edip bey‘-ı mezkûrun gabn ve tağrîrine ve mu‘accele-i mezbûrenin adem-i istifâsına müte‘allika âmme-i de‘âvî ve kâffe-i mutâlebâtdan cânib-i vakf-ı mezbûr ile zimmet-i mütevellî-i mersûmu ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Muharrem sene 1184. Şuhûdu’l-hâl: Şâhidûnü’s-sâbıkūn.