İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 61 Hüküm no: 16 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce bt. Osman’ın muhâlaa yoluyla Molla İshak’tan boşandığı Mahmiye-i İslambol’da Şehzâde Câmi‘-i şerîfi kurbünde Emin Nureddin mahallesinde sâkine ve zâtı ta‘rîf-i şer‘î ile mu‘arrefe olan Hadîce bt. Osman nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Hâfız es-Seyyid Molla İshak b. el-Hâc Hüseyin mahzarında ikrâr-ı tâm ve takrîr-i kelâm edip mezbûr Hâfız Molla İshak yirmi beş guruş mehr-i müeccel tesmiyesiyle bundan akdem beni tezevvüc ve duhûl ve tatlîk ve mehr-i mezkûrumu bana def‘ ü teslîm ben dahi ahz u kabz edip ba‘dehû otuz guruş mehr-i müeccel tesmiyesiyle tekrar beni tezevvüc ve duhûl ve hâlâ mehr-i mezkûr ile zevc-i dâhilim olup beynimizde hüsn-i imtizâcımız olmamağla zimmetinde ma‘kūdün-aleyh otuz guruş mehr-i müeccel-i mezkûrum ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hâfız es-Seyyid Molla İshak ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr Hâfız es-Seyyid Molla İshak’ın zimmetini ibrâ-i âmm-ı kātı‘u’n-nizâ‘le ibrâ ve ıskāt eylediğimde kezâlik hukūk-ı zevciyete ve benden matlûbu olan on sekiz guruş kıymetli bir sîmli bıçağa ve kıymetine müte‘allika âmme-i da‘vâdan benim zimmetimi ibrâ ve ıskāt edip ve herbirimiz âharın zimmetini ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Muharrem sene 1184. Şuhûdu’l-hâl: Akşehirli Osman Çelebi b. ( ), Ali Çelebi b. Abdullah, Mehmed b. Mehmed, Molla İsmail b. Ali.