İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 61 Hüküm no: 17 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Usta’nın azat ettiği Gürcü asıllı cariyesine bazı eşyasını hîbe ettiği Mahmiye-i İslambol’da Kiçi Hatun mahallesinde sâkine ve zâtı ta‘rîf-i şer‘î ile mu‘arrefe olan Hadîce Usta bt. Mehmed nâm hatun meclis-i şer‘-i şerîf-i enverde kendiye rıkkıyetini mu‘terife olan orta boylu kara kaşlı kara gözlü Gürciyyetü’l-asl Müslimetü’l-mille hâfızatü’l-kitâb Nazende nâm-ı diğer Safiye bt. Abdullah nâm câriye-i memlûkesi mahzarında ikrâr-ı tâm ve takrîr-i kelâm edip câriyem mevsûfe-i mezbûre Safiye’yi hasbeten li’llâhi’l-aliyyü’l-a‘lâ ve hasbeten li-rûhi rasûlihi’l-mu‘allâ mâlımdan tahrîr ve i‘tâk ve kayd-ı rıkkıyetden ihrâc ve ıtlâk edip harâir-i asliyât zümresine idhâl ve ilhâk eyledim ba‘de’l-yevm mevsûfe-i mezbûre Safiye sâir harâir-i asliyât gibi olup üzerinde benim [hakk-ı] velâdan gayrı hakkım kalmadı dedikden sonra mezbûre Hadîce Usta yine meclis-i şer‘de mu‘tekası mu‘arrefetü’z-zât mezbûre Safiye mahzarında iâde-i kelâm edip eşyâ-i memlûkemden ber-mûceb-i defter-i müfredât yirmi beş miskāl bir çift altın bilezik ve yirmi beş miskāl iki başlı bir altın kuşak ve seksen guruş kıymetli bir çift zümrüd küpe ve bir sagīr elmas altın yüzük ve bir mıknatısî altın yüzük ve tamgahâneye kaplı bir cedîd sincab kürk ve dallı keremsûd kaplı bir kakum kürk ve bir cedîd tamgahâne anteri ve bir dallı keremsûd anteri ve bir sâde keremsûd anteri ve bir çatarî entâri ve beş kat cedîd çamaşur ve beş kat müsta‘mel çamaşur ve on yağlık ve sekiz müsta‘mel baş yemenîsi, beş cedîd mücessem yemenî ve altı müsta‘mel şayak yasdık ve iki kebîr minder ve iki yan minderi ve dört müsta‘mel mak‘ad ve iki beyâz boy şiltesi ve bir müsta‘mel çit döşek ve iki döşek çârşebi ve bir penbe döşek şiltesi ve iki baş yasdık ve iki köşe yasdığı ve bir müsta‘mel keçe ve bir dülbend yemenî yorgan ve bir Leh-kârî yorgan ve dört çit yorgan ve dört tencere ve altı kapaklı sahan ve bir hoşâb tası ve bir tâbe ve bir kebîr sini ve bir sagīr sini ve bir leğen ma‘a ibrik ve bir âbdest leğeni ve bir kebîr kenarlı kadayıf tepsisi ve bir sagīr fincan tepsisi ve üç kahve ibriği ve bir bakır mangal ve bir şam‘dânımı hîbe-i sahîha-i şer‘iye ile mu‘tekam mezbûre Safiye’ye hîbe ve temlîk ve teslîm eylediğimde ol dahi ber-vech-i muharrer meclis-i hîbede ittihâb ve temlîk ve tesellüm ve kabz ve kabûl etmeğin min-ba‘d eşyâ-i muharrere-i mezkûre mu‘tekam merkūme Safiye’nin mülk-i mevhûbu ve hakk-ı sarîhi olup kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 Muharrem sene 1184. Şuhûdu’l-hâl: Hâlâ Solakbaşı el-Hâc İbrahim Ağa, Kahveci Osman Beşe, Yorgancı Mustafa, Yorgancı İsmail, Başçukadâr Mustafa, Attar el-Hâc Mustafa, Molla Mehmed Şâkir b. İbrahim.