İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 62 Hüküm no: 18 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Kazer’ın haffâf dükkânı gediğini içindekilerle birlikte sattığı Mahmiye-i İslambol’da Şehzâde Sultân Câmi‘-i şerîfi kurbünde vâki‘ Haffâflar sûkunda haffâf olan Ariton v. Kazer nâm zimmî meclis-i şer‘-i şerîf-i enverde köylüsü işbu hâmilü’r-rakīm Bogos v. Bedros muvâcehesinde ikrâr ve takrîr-i kelâm edip sûk-ı mezkûrda vâki‘ tasarrufumda olan haffâf dükkânı derûnunda mevcûde yedimde mâlım ve mülküm olan ber-mûceb-i defter-i müfredât cemî‘ haffâf emti‘a-i ma‘lûmemi ve gedik ta‘bîr olunur eşyâ ve bi’l-cümle sâir âlât-ı lâzımemi esnâfımız beyninde lonca ta‘bîr olunur cem‘iyetimiz ustalar ma‘rifetiyle târih-i kitâb şehri gurresinde tarafeynden [7a] îcâb ve kabûlü hâvî şürût-ı müfside ve muvâza‘adan ârî bey‘-ı kat‘î ve safka-i vâhide ile köylüm mersûm Bogos zimmîye üç yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semen-i mezkûr üç yüz guruşu köylüm mersûm yedinde ibkā edip helâkimden sonra meblağ-ı mezkûrun yüz guruşu ile âyinimiz üzere benim levâzım-ı zimmetim umûruna harc u sarf olunup mâ‘adâ iki yüz guruşu dahi veresem beyninde alâ-mâ-farazallâhu te‘âlâ tevzî‘ ve taksîm oluna deyip bey‘-ı mezkûrun gabn ve tağrîrine ve bi’l-cümle gedik husûsuna müte‘allika âmme-i da‘vâdan köylüm mersûm Bogos zimmînin zimmetini ibrâ ve ıskāt edip ol dahi ibrâyı kabûl etmeğin sâlifü’z-zikr haffâf dükkânı derûnunda mevcûde cemî‘ haffâf emti‘ası ve gedik ta‘bîr olunur eşyâ ve bi’l-cümle sâir âlât-ı lâzıme-i ma‘lûme târih-i mezkûrdan beri köylüm mersûm Bogos zimmînin mülk-i müşterâsı ve hakk-ı sırfı olup eşyâsında ve gediğinde hâlâ benim kat‘a alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Muharrem sene 1184. Şuhûdu’l-hâl: Haffâflar Kethudâsı Mehmed Ağa, Kulağuz Hasan Ağa, Kahveci Ömer Efendi, Hacı Hâfız Efendi, Mustafa Ağa, Papa Kirkor zimmî, Yiğitbaşı Bağdasar, Usta Fanosti zimmî, Karabet zimmî, Ariton zimmî.