İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 63 Hüküm no: 19 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şarko v. Yuvan’ın Koska’daki ekmekçi fırını ile Aksaray’daki değirmen hissesini sattığı Habbâz tâifesinden İslambol’da Koska’da ekmekçi Şarko v. Yuvan nâm zimmî meclis-i şer‘-i şerîf-i enverde yine tâife-i mezbûreden işbu bâ‘isü’l-vesîka Ali Berbad b. Mustafa nâm kimesne mahzarında ikrâr-ı tâm ve takrîr-i kelâm edip mârrü’z-zikr Koska kurbünde vâki‘ bir bâb ekmekçi fırını ve fırın-ı mezkûra ta‘yîn ve merbût Aksaray’da vâki‘ altı horoslu değirmen derûnunda mevcûde gedik ta‘bîr olunur yirmi dört re’s bargir ve sâir ber-mûceb-i defter-i müfredât âlât-ı lâzıme ve eşyâ-i ma‘lûmenin dört sehim i‘tibârıyla bir sehm-i şâyi‘i benim mâlım ve mülküm olmağla ben i‘tibâr-ı mezkûr ile zikrolunan fırın ve değirmenden mâlik olduğum bir sehim hisseme isâbet eden altı re’s bargirler ile âlât-ı lâzıme ve eşyâ-i ma‘lûmede hissemi tarafeynden îcâb ve kabûlü hâvî şürût-ı müfsideden ârî bey‘-ı kat‘î ve safka-i vâhide ile iki yüz guruşa mezbûr Ali Berbad’a bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezkûr iki yüz guruşu mezbûr Ali Berbad yedinden bi’t-tamam ve’l-kemâl ahz u kabz edip bey‘-ı mezkûrun tağrîr ve gabnine ve istifâ-yı semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik ba‘de’l-yevm mârrü’z-zikr fırın ve değirmen derûnunda mevcûde bargirin ber-mûceb-i i‘tibâr-ı mezkûr bir sehmine isâbet eden altı re’s bargirler âlât-ı lâzıme ve eşyâ-i ma‘lûmesiyle mezbûr Ali Berbad’ın mülk-i müşterâsı ve hakk-ı sırfı olup kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î mezbûr Ali Berbad şürût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü [7b] vaz‘ [ve] hareket etmemek üzere ta‘ahhüd etmeğin mâ-hüve’l-vâki‘ bi’l-ibtigā ketb ve imlâ olundu. Fî 12 Muharrem sene 1184. Şuhûdu’l-hâl: Ekmekciler Kethudâsı Ali Ağa, Kanlıfırın Ustası Ahmed Ağa, Uncular Kethudâsı Mustafa, Yiğitbaşı Molla Osman, Salıcı Molla Osman, Balat-ı cedîd Ustası Molla Ahmed, Ayvansaray Ustası Hüseyin Beşe, Acımusluk Ustası Molla Ahmed.