İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 64 Hüküm no: 20 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Hüseyin Efendi’nin alacağını tahsil etmek üzere Mehmed Ağa’yı vekil tayin ettiği Mahmiye-i İslambol’da Sarrâchâne kurbünde Mimar Ayas mahallesinde sâkin kuzâtdan el-Hâc Hüseyin Efendi b. Mehmed meclis-i şer‘-i şerîf-i enverde eş-Şeyh Mehmed Efendi hazır olduğu hâlde bâ‘isü hâzihi’l-vesîka Mehmed Ağa b. Ahmed mahzarında ikrâr-ı tâm ve takrîr-i kelâm edip ben diyâr-ı âhara âzim olmamla hâzır-ı merkūm eş-Şeyh Mehmed Efendi zimmetinde bin yüz seksen üç senesi Şa‘bâni’l-mu‘azzamı’nın gurresi târihiyle müverrah imzâ ve hâtemini hâvî işbu bir kıt‘a temessük mantûkunca cihet-i karzdan bin beş yüz kırk beş guruşdan bâkī bin beş yüz on dokuz guruş hakkım olmağla meblağ-ı bâkī-i merkūm bin beş yüz on dokuz guruşu hâzır-ı merkūm eş-Şeyh Mehmed Efendi’den taleb ve da‘vâ ve ahz u kabza ve makbûzunu bana îsâl ve teslîme ve bunun mütevakkıf olduğu umûrun küllîsine tarafımdan mezbûr Mehmed Ağa’yı vekîl ve nâib-i menâb nasb ü ta‘yîn eyledim dedikde ol dahi ber-vech-i muharrer vekâlet-i mezbûreyi kabûl ve merâsimini kemâ-yenbagī ikāmet ve edâya ba‘de’t-ta‘ahhüd hâzır-ı mezbûr medyûn eş-Şeyh Mehmed Efendi dahi deyn-i meblağ-ı mezkûr bin beş yüz on dokuz guruşu vekîl-i mezbûr Mehmed Ağa’ya edâ ve teslîme ta‘ahhüd etmeğin mâ-vaka‘a bi’t-taleb ketb olundu. Fî 14 Muharrem sene [1]184. Şuhûdu’l-hâl: Bağçevânlar Kethudâsı Hasan Ağa b. Osman, Merhabâzâde Mahmud Efendi el-mukayyid, Hâfız Süleyman Efendi b. Mehmed, Muhzır Ali Çelebi b. Abdullah, Baltacı el-Hâc Mustafa b. Hüseyin.