İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 65 Hüküm no: 21 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Ahmed’in alacak hususunda küçüklüğünden beri kendisini yanına alıp hizmetinde bulunduran Emetullah Hatun’un zimmetini ibrâ ettiği Husûs-ı âti’l-beyânının mahâllinde ketb ve tahrîri için bi’l-iltimâs savb-ı şer‘-i enverden Kâtib es-Seyyid Mehmed Efendi irsâl olunup ol dahi mahmiye-i İslambol’da Ebulfeth Sultân Mehmed Han Câmi‘-i şerîfi kurbünde Mimar Sinan mahallesinde Çukadâr Hasan b. Mehmed’in müste’ciren sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm eyledikde fi’l-asl vilâyet-i Rumeli’de medîne-i Sofya’da Karaşahin mahallesi sâkinelerinden olup menzil-i mezkûrda sâkine ve hâlâ on yedi yaşında olup bulûğunu mu‘terife ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Zeyneb bt. Ahmed b. İsmail nâm bikr-i bâliğa meclis-i ma‘kūd-ı mezkûrda mahmiye-i mezbûrede Sinan Ağa mahallesinde eşrâf-ı kuzât-ı kirâm-ı zevi’l-ihtirâmdan Hatvanîzâde fazîletlü Ahmed Efendi’nin menzilinde müsâfiren sâkine ve mârrü’z-zikr Karaşahin mahallesi sâkinelerinden olup kezâlik zâtı mu‘arrefe olan işbu bâ‘isetü’l-vesîka Emetullah Hatun bt. Salih mahzarında bi-tav‘ihâ ikrâr-ı tâm ve takrîr-i kelâm edip mezbûre Emetullah Hatun üç buçuk yaşımda iken beni yanına alıp târih-i kitâba gelince on üç buçuk sene mikdârı beni terbiye ve infâk ve iksâ ve iplik işleme ve tabh-ı ta‘âmı bana ta‘lîm ve müddet-i mezkûrede bazı menzili hizmetinde beni istihdâm etmişidi el-hâletü hâzihî ben nefsimi bir kimesneye tezvîc ile mezbûre Emetullah Hatun’dan müfârakat etmemle sinîn-i mezkûrede mezbûre Emetullah Hatun’a sebk eden hizmetimin ecr-i misline ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mezbûre Emetullah Hatun’un zimmetini şürût-ı müfsideden ârî ibrâ-ı âmm-ı sahîh-i şer‘î ile ibrâ ve ıskāt eylediğimde ol dahi ibrâ-yı mezkûru kabûl eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Çukadâr Hasan Ağa b. Ali ve Muhzır Mısırlı Hüseyin b. Süleyman ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb ve imlâ olundu. Fî 17 min-Muharrem sene [1]184. Şuhûdu’l-hâl: Çukadâr Hasan Ağa b. Ali, Hüseyin Ağa b. Hasan be-mahalle-i mezbûre, Mahalle-i mezbûreden Süleyman Ağa b. Abdullah, Mahalle-i mezbûreden Taşcı es-Seyyid Ali b. İbrahim.