İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 66 Hüküm no: 22 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Usta’nın nalçacı esnafı kethudâlığına tayin olunduğu Âsitâne-i aliyye’de vâki‘ na‘lçacı esnâfının kethudâları el-Hâc İsmail b. Hüseyin nâm kimesne meclis-i şer‘-i şerîf-i enverde esnâf-ı mezkûre ustalarından ehl-i hibre Ahmed Usta ve Osman Usta ve Mehmed Usta ve Ali Usta ve İsmail Usta ve diğer Ali Usta ve Mustafa Usta ve Salih Usta [8a] ve Hüseyin Usta ve diğer Mehmed Usta ve es-Seyyid Musa ve diğer Mustafa Usta ve Hasan Usta ve diğer Hüseyin Usta ve Feyzullah Usta ve Mütevellî es-Seyyid Mehmed Usta ve Ahmed Usta ve es-Seyyid Mustafa Usta ve Mehmed Emin Usta ve Abdullah Usta ve es-Seyyid Ahmed Usta ve es-Seyyid Osman ve âhar Ali Usta hazırlar oldukları hâlde kethudâlık umûrunu idâreden izhâr-ı acz ve keff-i yed etmekle içlerinden biri kethudâ nasb olunmasını iltimâs ve işbu bâ‘isü’l-kitâb Tahtakale’de Mustafa Usta b. Ali nâm kimesneyi bi’l-cümle esnâf ustaları hâzırûn-ı merkūmûn ihtiyâr ve idâreye kādir olduğunu ihbâr etmeleriyle a‘lâ-yı kitâbı tevkī‘-i müstetâbı ile tezyîn buyuran hâkim-i hâsim efendi hazretleri mezbûr Mustafa Usta’yı esnâf-ı mezkûre üzerine talebleriyle kethudâ nasb ü ta‘yîn ve umûr-ı mu‘tâdelerini alâ-vechi’l-istikāme rü’yet etmek üzere tensîb buyurduklarında ol dahi kabûl ve hilâf-ı şer‘-i şerîf vaz‘ ve hareket etmeyip kadîmî üzere emrlerini rü’yet ve idâreye müte‘ahhid olmağın mâ-hüve’l-vâki‘ bi’l-ibtigā ketb ü imlâ olundu. Fî 16 Muharrem sene [1]184. Şuhûdu’l-hâl: Kethudâ-yı Muhzırân Mehmed Ağa, İsmail Çelebi b. Ali, Ali Çelebi b. Abdullah, Baltacı el-Hâc Mustafa.