İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 66 Hüküm no: 23 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin tasarrufunda olan vakıf menzilini devrettiği Mahmiye-i İslambol’da el-Hâc Hamza mahallesinde sâkin Ali Çelebi b. İbrahim nâm kimesne meclis-i şer‘-i şerîf-i enverde yetmiş altı senesi Cumâdelâhiresi gurresinde vefât eden Mahbûbe Hadîce bt. Abdullah nâm hatunun sagīr oğlu Hasan ve sagīre kızı Âişe’nin tesviye-i emrlerine bâ-hüccet-i şer‘iye vasîyy-i muhtârı olan fahrü’l-eşbâh hâlâ Yedikule ağası işbu sahibü’l-kitâb Ahmed Ağa b. Hasan mahzarında ikrâr-ı tâm ve takrîr-i kelâm edip ashâb-ı hayrâtdan merhûm İsmail Efendi’nin mekteb vakfından olup mahalle-i mezbûrede vâki‘ bir tarafdan Cebeci Hüseyin menzili ve bir tarafdan ba‘zen Başkapıkethudâsı Hüseyin Ağa ve ba‘zen Kapıkethudâsı Mehmed Ağa menzilleri ve bir tarafdan bostan ve bir tarafdan tarîk-i âm ile mahdûd ma‘lûmü’l-müştemilât bi’l-icâreteyn tasarrufumda olan bir bâb menzilimi müteveffât-ı mezbûre Mahbûbe Hadîce Hatun’un vefâtından beş ay mukaddem sene-i mezkûre Muharremi gurresinde hayatında yedinden istidâne ve kabz eylediğim dört yüz guruş deynim mukābelesinde sûret-i kat‘îde bâ-re’y-i mütevellî mezbûre Mahbûbe Hadîce Hatun’a vefâen ferâğ ve tefvîz ve deyn-i mezkûrumu mezbûre Mahbûbe Hadîce Hatun’a kable’l-edâ menzil-i mezkûru rehniyetinden tahlîs etmeden mezbûre [menzil-i] mezkûrun şehriye üçer guruş ecr-i misli olmağla asl-ı deyn-i mezkûr dört yüz guruş ile târih-i mezkûrdan târih-i kitâb şehri gurresine gelince ücret-i menzilden müctemi‘a iki yüz yetmiş üç guruş ki cem‘an altı yüz yetmiş üç guruşu vasîyy-i mûmâ-ileyh Ahmed Ağa bu esnâda bi’l-vesâye benden taleb ve da‘vâ ve benim dahi bir vechile edâya iktidârım olmadığına binâen bâ-tavassut-ı muslihîn ben menzil-i mezkûru kendi hüsn-i rızâ ve tayyib-i hâtırımla bâ-re’y-i mütevellî sagīrân-ı mezbûrâna meblağ-ı mecmû‘-ı mezkûr altı yüz yetmiş üç guruş mukābelesinde ferâğ-ı mu‘teber-i kat‘î ile kendileri enfa‘ ve evlâ olmağla ferâğ ve tefvîz eyledikde vasîyy-i mûmâ-ileyh Ahmed Ağa dahi ber-vech-i muharrer bi’l-vesâye tefevvüz ve kabûl etmeğin ol vechile deyn-i mezkûrdan benim zimmetimi tebri’e ve menzil-i mezkûr sagīrân-ı mezbûrân Hasan ve Âişe’nin dâhil-i havza-i tasarrufları olup kat‘a benim alâka ve medhalim kalmamağla menzil-i mezkûra ve bedeline ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan sagīrân-ı mezbûrân Hasan ve Âişe ile vasîyy-i mûmâ-ileyh Ahmed Ağa’dan herbirinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip ve menzil-i mezkûru dahi tahliye ve teslîme ta‘ahhüd eyledim dedikde vasîyy-i mûmâ-ileyh Ahmed Ağa dahi mukırr-ı merkūm Ali Çelebi’yi vicâhen ve şifâhen tahkīk ve tasdîk ve ibrâsını kabûl etmeğin mâ-vaka‘a bi’t-taleb ketb olundu. Fî 10 Muharremi’l-harâm sene 1184. Şuhûdu’l-hâl: Evliyâ Mehmed Efendi b. Mehmed imâm-ı mahalle-i Sancakdâr Hayreddin, Hâfız Osman Efendi, Kapıcı Ömer b. Mustafa, Kahveci Mehmed Ağa b. el-Hâc Hüseyin, Mustafa Çavuş Çavuşzâde, Ali b. Mustafa.