İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 67 Hüküm no: 24 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Sinan’ın bir fırın ile değirmendeki gedik hissesini sattığı Habbâz tâifesinden İslambol’da Müftü Hamamı’nda vâki‘ fırında Ekmekçi Sinan b. Hasan b. Sinan tarafından husûs-ı [âti’l]-beyânı ikrâra vekîl olduğu Osman Beşe b. Nezir ve Mehmed Beşe b. Mustafa ve Ebûbekir b. Mustafa ve Ahmed Beşe b. Mehmed nâm kimesneler şehâdetleriyle sâbit olan Hüseyin b. Mustafa nâm kimesne meclis-i şer‘-i şerîf-i enverde işbu ashâbü’l-kitâb Osman b. Süleyman ve Ahmed b. Mustafa ve diğer Hüseyin b. Ahmed nâm kimesneler mahzarlarında bi’l-vekâle ikrâr ve takrîr-i kelâm edip mârrü’z-zikr ekmekçi fırını ve ona merbût ve müte‘ayyin Eğrikapı dâhilinde vâki‘ beyne’l-ahâlî ma‘lûmü’l-hudûd dört horoslu değirmen derûnunda mevcûd on altı re’s bargir ile sâir ber-mûceb-i defter-i müfredât âlât-ı lâzıme ve eşyâ-i ma‘lûme müvekkilim mezbûr Sinan’ın müstakillen yedinde mâlı ve mülkü iken müvekkilim mezbûr Sinan mârrü’z-zikr fırın ve değirmende olan gedik ta‘bîr olunur bargirler ve bi’l-cümle sâir âlât-ı lâzıme ve eşyâ-i ma‘lûmenin dört sehim i‘tibârıyla üç sehmine isâbet eden on iki re’s bargirleri âlât-ı lâzıme ve eşyâ-i ma‘lûmeleriyle tarafeynden îcâb ve kabûl ü hâvî şürût-ı müfsideden ârî bey‘-ı kat‘î ve safka-i vâhide ile mezbûrûn Osman ve Ahmed ve diğer Hüseyin’e her re’s bargiri yüz ellişer guruşdan cem‘an bin sekiz yüz guruşa mütesâviyen bey‘ ve temlîk ve teslîm eylediğinde onlar dahi ber-vech-i muharrer iştirâ ve temellük ve tesellüm eylediklerinden sonra semen-i mecmû‘-ı mezkûr bin sekiz yüz guruşu mezbûrûn Osman ve Ahmed ve diğer Hüseyin yedlerinden tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan herbiri âharın zimmetini ibrâ ve ıskāt ve biribirlerinin ibrâlarını kabûl eylediler fîmâ-ba‘d sâlifü’z-zikr fırın ve değirmen derûnlarında mevcûde bargirler ve bi’l-cümle sâir âlât-ı lâzıme-i ma‘lûmenin i‘tibâr-ı mezkûr ile üç sehmine isâbet eden on iki re’s bargirler âlât-ı lâzıme ve eşyâ-i ma‘lûmeleriyle mezbûrûn Osman ve Ahmed ve diğer Hüseyin’in ale’l-iştirâki’s-seviy mülk-i müşterâları ve hakk-ı sırfları olup müvekkilim mezbûrun kat‘a alâka ve medhali kalmamışdır dedikde gıbbe’t-tasdîkı’ş-şer‘î mezbûrûn Osman [ve] Ahmed ve diğer Hüseyin şurût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ ve hareket etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 17 Muharrem sene 1184. Şuhûdu’l-hâl: Ekmekciler Kethudâsı Ali Ağa, Salıcı Molla Osman, Kanlıfırın Ustası Ahmed Ağa, el-Hâc Mahmud Ağa, Yiğitbaşı Molla Osman.