İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 68 Hüküm no: 25 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Sinan’ın bir fırın ve değirmendeki gedik hissesini sattığı Habbâz tâifesinden İslambol’da Müftü Hamamı’nda vâki‘ fırında ekmekçi Sinan b. Hüseyin b. Sinan tarafından husûs-ı âti’l-beyânda vekîl olduğu Osman Beşe b. Nezir ve Mehmed Beşe b. Mustafa ve Ebûbekir b. Mustafa ve Ahmed Beşe b. Mehmed nâm kimesneler şehâdetleriyle sâbit [olan] Hüseyin b. Mustafa nâm kimesne meclis-i şer‘-i şerîf-i enverde işbu ashâbü’l-kitâb Hüseyin b. Hasan nâm kimesne mahzarında bi’l-vekâle ikrâr ve takrîr-i kelâm edip mârrü’z-zikr ekmekçi fırını ve ona merbût ve müte‘ayyin Eğrikapı dâhilinde vâki‘ beyne’l-ahâlî ma‘lûmü’l-hudûd dört horoslu değirmen derûnunda mevcûd on altı re’s bargir ile sâir ber-mûceb-i defter-i müfredât âlât-ı lâzıme ve eşyâ-i ma‘lûme müvekkilim mezbûr Sinan’ın müstakillen yedinde mâlı ve mülkü iken müvekkilim mezbûr Sinan mârrü’z-zikr fırın ve değirmende [9a] olan gedik ta‘bîr olunur bargirler ve bi’l-cümle âlât-ı lâzıme ve eşyâ-i ma‘lûmenin dört sehim i‘tibârıyla üç sehmine isâbet eden on iki re’s bargirleri âlât-ı lâzıme ve eşyâ-i ma‘lûmeleriyle işbu hâzırûn bi’l-meclis Osman b. Süleyman ve Ahmed b. Mustafa ve diğer Hüseyin b. Ahmed nâm kimesnelere semen-i makbûza bey‘ ve temlîk ve kıbel-i şer‘den mezbûrûnun yedlerine bir kıt‘a hüccet-i şer‘iye i‘tâ olunmuşidi el-hâletü hâzihî müvekkilim mezbûr Sinan’ın i‘tibâr-ı mezkûr ile yedinde bâkī kalan dört sehimden bir sehmine isâbet eden dört re’s bargirleri bi’l-cümle sâir âlât-ı lâzıme ve eşyâ-i ma‘lûmeleriyle tarafeynden îcâb ve kabûlü hâvî şürût-ı müfsideden ârî bey‘-ı kat‘î ve safka-i vâhide ile mezbûr Hüseyin’e altı yüz guruşa bi’l-vekâle bey‘ ve temlîk ve lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semen-i mezkûr altı yüz guruşu mezbûr Hüseyin yedinden vekâleten bi’t-tamam ve’l-kemâl ahz u kabz ve müvekkilim mezbûr Sinan’ın hınta-bahâsından cânib-i mîrîye ve kapan tüccârına olan düyûnuna vekâleten teslîm ve edâ edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan ben bi’l-vekâle mezbûr Hüseyin’in zimmetini ol dahi kezâlik benim ve müvekkilim mezbûr Sinan’ın herbirimizin zimmetlerini ibrâ-i âm ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm sâlifü’z-zikr fırın ve değirmen derûnunda mevcûde bargirler ve bi’l-cümle sâir âlât-ı lâzıme ve eşyâ-i ma‘lûmenin ber-mûceb-i i‘tibâr-ı mezkûr dört sehimden bir sehmine isâbet eden altı re’s bargir [ve] âlât-ı lâzıme ve eşyâ-i ma‘lûmeleriyle mezbûr Hüseyin’in mülk-i müşterâsı ve hakk-ı sırfı olup müvekkilim mezbûr Sinan’ın kat‘a alâka ve medhali kalmamışdır dedikde gıbbe’t-tasdîkı’ş-şer‘î mezbûr Hüseyin şürût-ı nizâmları üzeri sayf ve şitâda altı aylık zahîre der-anbar edip hilâf-ı fermân ve mugāyir-i nizâm asla ve kat‘a bir türlü vaz‘ ve hareket etmemek üzere ta‘ahhüd etmeğin mâ-hüve’l-vâki‘ bi’t-taleb ketb olundu. Fî 17 Muharrem sene 1184. Şuhûdu’l-hâl: Şâhidûnü’s-sâbıkūn.