İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 69 Hüküm no: 26 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üç aydan beri kaybolan Kuruyemişçi Mustafa’nın dükkânının açılarak kayyıma devredilen mallarının defteri Bi’t-taleb kıbel-i şer‘den mürsel Kâtib Ali Efendi İstanbul’da Yemiş İskelesi kurbünde kuruyemişciler sûkunda vâki‘ bir bâb kuruyemişci dükkânına varıp dükkân-ı mezkûrda müste’cir olup üç ay mukaddem firâr ve gaybet-i münkatı‘a ile gāib olup hayat ve memâtı ma‘lûm olmayan Kuruyemişci Mustafa’nın dükkân-ı merkūmda terk eylediği eşyâsını tahrîr için dükkân-ı merkūmun mutasarrıfları Mehmed ve Mahmud taraflarından vekîl-i müseccelleri Mehmed Yazıcı talebi ve sâdır olan fermân-ı âlî ve bir kıt‘a i‘lâm mûceblerince dükkân-ı merkūm esnâf-ı mezbûre muvâcehelerinde küşâd ve derûnunda zuhûr eden gāib-i merkūmun eşyâsı hâli mütebeyyin olunca telef olunmak ihtimâli olmayan eşyâsı bi-a‘yânihâ hıfz ve telef olmak ihtimâli olan eşyâsı bey‘e ba‘de’l-izn el-yevm kıymet-i misilleri idüğü esnâf-ı mezbûreden zeyl-i defterde mastûrü’l-esâmî Müslimîn ihbârlarıyla lede’ş-şer‘ zâhir olan eşyâ-i mezkûrenin ba‘de’l-vezn kıymetleri herbirinin tahtlarına vaz‘ olunan meblağı hıfz olunup mezbûrun hâli mütebeyyin oluncaya değin emîn ve mu‘temed olduğu dahi ihbâr olunan mezbûr Mehmed Yazıcı kıbel-i şer‘den kayyım nasb ü ta‘yîn ve yedine teslîm eylediği eşyâ defteridir ki ber-vech-i âtî zikrolunur. Fi’l-yevmi’r-râbi‘ min-Muharremi’l-harâm li-sene erba‘a ve semânîn ve mie ve elf. (9b) Çürük Edremid siyahı 25 kıyye, fî 6 meblağ: 150 Kaysı-i Şam 23 kıyye, fî 30 meblağ: 690 Çürük sarıca inciri 29 kıyye, fî 9 meblağ: 261 Sele? 24 kıyye, fî 10 meblağ: 240 Çürük lop inciri 59 kıyye, fî 10 meblağ: 590 Çürük beylerce 4 kıyye, fî 3 meblağ: 12 Amasya e[r]iği 18 kıyye, fî 5 meblağ: 90 Keçiboynuzu 20 kıyye, fî 5 meblağ: 100 Vişne 2 kıyye, fî 10 meblağ: 20 Eski kuşüzümü 59 kıyye, fî 10 meblağ: 590 Sagīr ve kebîr boş kutular ve boş kalemler 15 aded, 20 aded meblağ: 240 Eski kefere tüfengi 1 aded Cem‘an yekûn Meblağ: 2.983 Şuhûdu’l-hâl: Kethudâ el-Hâc Mustafa, Kara Ali, Molla Ahmed, Molla Mehmed, el-Hâc Mehmed, diğer el-Hâc Mustafa, Oruçoğlu Hasan, Katırcızâde Hasan, Bakkallar Bölükbaşısı Ahmed Usta.