İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 70 Hüküm no: 27 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Sahak’ın kölesini azat ettiği Mahmiye-i İslambol’da Mirâhur mahallesinde mütemekkin Ekmekçi Sahak v. Kirkor nâm zimmî meclis-i şer‘-i şerîf-i enverde kendiye rıkkını mu‘terif olan orta boylu kara kaşlı kara gözlü Gürciyyü’l-asl Nasrâniyü’l-mille bâ‘isü’s-sifr Petro v. Bayok nâm abd-i memlûkü muvâcehesinde bi’t-tav‘i’s-sâf ikrâr ve i‘tirâf edip yedimde mâlım olan mevsûf-ı mersûme Petro’yu lâ li-ivazın ‘âcil ve lâ li-garazin âcil mâlımdan tahrîr ve i‘tâk ve kayd-ı rıkdan ihrâc ve ıtlâk [edip] sâir ahrâr-ı asliyyîn zümresine idhâl ve ilhâk eyledim ba‘de’l-yevm mevsûf-ı mersûm Petro sâir ahrâr-ı asliyyîn gibi hür olup üzerinde benim [hakk-ı] velâdan gayrı hakkım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Muharrem sene 1184. Şuhûdu’l-hâl: es-Seyyid İbrahim Efendi b. Mustafa imâm-ı mahalle-i Mirâhur, Hâfız es-Seyyid Molla Halil b. el-mezbûr es-Seyyid İbrahim, Abdülkerim Efendi b. Halil, Kanlıfırın Ustası Ahmed Ağa, Usta Mardiros v. Sekyas, Ferhad v. Kirkor, Toma v. Kirkor.