İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 71 Hüküm no: 28 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Ariton’un kardeşine olan borcunu altı ay içerisinde ödemeye söz verdiği Medîne-i Eyyûb-i Ensârî -aleyhi rahmeti’l-Bârî- mahallâtından Servi mahallesi mütemekkinelerinden olup şahsı ta‘rîf-i şer‘î ile mu‘arrefe olan Saltana bt. Ariton nâm Nasrâniye meclis-i şer‘-i şerîf-i enverde li-ebeveyn karındaşı olup mahmiye-i İslambol’da Kumkapı kurbünde Nişâncı İbrahim Paşa mahallesinde mütemekkin işbu bâ‘isü’r-rakīm Agop nâm zimmî muvâcehesinde ikrâr ve takrîr-i kelâm edip mukaddemâ hâlik olan anamız Marta bt. Kirkor nâm Nasrâniye’nin mecmû‘-ı terekesi benim yanımda bulunmağla ben kabz ve karındaşım mersûm Agop zimmîye anam hâlike-i mezbûrenin terekesinden isâbet eden hisse-i irsiyesinden dokuz yüz yirmi bir guruşunu ben ahz ve umûruma sarfla istihlâk edip ol vechile meblağ-ı mezbûr dokuz yüz yirmi beş guruş karındaşım mersûm Agop zimmîye bi-tarîkı’d-damân zimmetimde lâzımü’l-edâ deynim olmağla ben meblağ-ı mezbûrun doksan guruşunu karındaşım mersûm Agop zimmîye bu esnâda teslîm ve edâ edip zimmetimde sekiz yüz otuz bir guruş deynim bâkī kalıp lâkin ben deyn-i bâkī-i mezkûr sekiz yüz otuz bir guruşu hâlâ edâya iktidârım olmadığına binâen tecîle tâlibe olduğumda karındaşım mersûm Agop zimmî dahi deyn-i meblağ-ı mezbûr sekiz yüz otuz bir guruşu târih-i kitâbdan altı ay tamamında [10a] ben kendiye tamamen edâ ve teslîm etmek üzere talebimle beni tecîl eyledikde ben dahi kabûl ve müddet-i mezkûre tamamında deyn-i meblağ-ı bâkī-i mezkûr sekiz yüz otuz bir guruşu karındaşım mersûm Agop zimmîye teslîm ve edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Muharrem sene 1184. Şuhûdu’l-hâl: Ali Efendi b. Ali, Çukadâr Mehmed Emin b. Ahmed, Eyyûbî Cizyedâr Abdurrahman b. Mehmed.