İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 71 Hüküm no: 29 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un oğlu Çorbacı Selim Ağa’nın terekesi hususunda alacağını tahsil edip vasî ve vekilin zimmetlerini ibrâ ettiği Mahmiye-i İslambol’da Arabacı Bâyezid mahallesinde sâkine ve zâtı ta‘rîf-i şer‘î ile mu‘arrefe olan Safiye Hatun bt. Yusuf meclis-i şer‘-i şerîf-i enverde Dergâh-ı âlî yeniçerileri yazıcılarından hâlâ ordu-yı hümâyûnda mevcûd ve işbu sahibü’l-kitâb Sekbânbaşızâde es-Seyyid İsmail Efendi b. Abdurrahman tarafından husûs-ı âtîde vekîl-i şer‘îsi olan yine yazıcıyân-ı mezkûrdan üvey oğlu Mehmed Emin Efendi b. Süleyman mahzarında ikrâr-ı tâm ve takrîr-i kelâm edip Dergâh-ı âlî yeniçerileri çorbacılarından sadrî kebîr oğlum Çorbacı Selim Ağa b. Osman Efendi bundan akdem sefer-i hümâyûna âzim ve Bender kasabasına varıp kasaba-i mezbûrede bi-emrillâhi te‘âlâ fevt olup ve verâseti ancak bana münhasıra olmağla müvekkil-i merkūm es-Seyyid İsmail Efendi oğlu müteveffâ-yı mezbûrun hîn-i vefâtında yanında mevcûde terekesi esmânından hâsıl ba‘de ihrâci’l-mesârifi’l-lâzıme bi’l-vesâye vâzı‘u’l-yed olduğu ber-mûceb-i defter-i kassâm-ı askerî bin iki yüz yirmi iki buçuk guruşun dokuz yüz guruşunu mukaddemâ bana irsâl ve îsâl ve ben dahi ahz u kabz edip kıbel-i şer‘den kabzımı müş‘ir yedine bir kıt‘a hüccet-i şer‘iye i‘tâ olunmuşidi el-hâletü hâzihî meblağ-ı mezkûrdan bâkī üç yüz yirmi iki buçuk guruşun seksen yedi buçuk guruşunu nakden ve yüz altmış guruşu ile Rusiyyetü’l-asl Fethi nâm bir re’s câriye iştirâ ve vekîl-i merkūm Mehmed Emin Efendi yediyle bana irsâl ve îsâl etmekle ol dahi getirip câriye-i merkūmeyi bana teslîm ve nakden mezkûr seksen yedi buçuk guruşu dahi işbu meclis-i şer‘de bi’l-vekâle bana def‘ u teslîm eyledikde ben dahi ber-vech-i muharrer yedinden ahz u kabz edip ve meblağ-ı bâkī-i mezkûrun yetmiş guruşunu dahi câriye-i merkūmenin elbisesine ve sâire harc u sarf etmekle bi’l-cümle masrûf-ı mezkûru dahi benim makbûlüm olmağın ol vechile meblağ-ı bâkī-i mezkûr üç yüz yirmi iki buçuk guruşu dahi tamamen ahz u istifâ eyledim min-ba‘d meblağ-ı mezkûrdan gerek vasîyy-i müvekkil-i merkūm es-Seyyid İsmail Efendi ve gerek vekîl-i mezbûr Mehmed Emin Efendi yedlerinde ve kıbellerinde bir akçe ve bir habbe hakkım bâkī kalmamağla oğlum müteveffâ-yı mezbûrun dâhil-i defter-i kassâm ve hâric-i ez-defter bi’l-cümle ism-i mâl ıtlâk olunur mecmû‘-ı terekesine ve husûs-ı mirasa müte‘allika âmme-i de‘âvî ve kâffe-i mutâlebâtdan vasîyy-i müvekkil-i merkūm es-Seyyid İsmail Efendi ile vekîl-i mezbûr Mehmed Emin Efendi’den herbirinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip ol dahi ibrâyı kabûl eyledi dedikde gıbbe’[t-tasdîkı]’ş-şer‘î mâ-vaka‘a bi’t-taleb ketb olundu. Fî 19 min-Muharrem sene 1184. Şuhûdu’l-hâl: İmâm-ı mahalle Ahmed Efendi b. el-Hâc Ali, Berber Mustafa b. el-Hâc Salih, Halil Ağa b. Mustafa, Hüseyin b. Abdullah.