İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 72 Hüküm no: 30 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Şaban’ın talebi üzerine Fatma bt. Ali ile birlikte tasarruflarında bulunan vakıf menzilin aralarında hisselerine uygun şekilde paylaştırılması Husûs-ı âti’l-beyânın mahâllinde keşf ve taksîmi’çün kıbel-i şer‘-i enverden bâ-fermân-ı âlî irsâl olunan keşif nâibimiz Mevlânâ Ahmed Efendi ve hâssa mi‘mârlarından es-Seyyid İbrahim ve Yahya halîfeler ve sâir ümenâ-i şer‘le mahmiye-i İslambol’da Kızılmaslak kurbünde Alembey Mescid-i şerîfi havlusunda vâki‘ bir tarafdan Kethudâ-yı sayyâgîn Vakfı’ndan ba‘zen Zeyneb Hatun ve ba‘zen Molla Hatun tasarruflarında olan menziller ve bir tarafdan Müezzin Mahmud Efendi menzili ve iki tarafdan tarîk-i hâs ile mahdûd gallesi müezzine meşrûta olan vakıf menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf etdikde menzil-i mezkûrun mütevellîsi olan mârrü’z-zikr Alembey Mescid-i şerîfi müezzini mezbûr Mahmud Efendi hazır olduğu hâlde zâtı ta‘rîf-i şer‘î ile mu‘arrefe olan Zeyneb bt. Şa‘ban nâm hatun meclis-i ma‘kūd-ı mezkûrda kezâlik zâtı mu‘arrefe olan Fâtıma bt. Ali muvâcehesinde takrîr-i kelâm ve ifâde-i merâm edip işbu mu‘âyene olunan vakıf menzil-i mezkûrun dört sehimden bir sehm-i şâyi‘i benim olup ve üç sehm-i şâyi‘i dahi mezbûre Fâtıma Hatun’un olmağla menzil-i mezkûr kābil-i taksîm olup hisselerimiz ifrâz ve ta‘yîn olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân dahi li-ecli’t-taksîm takvîm ve mesâha eylediklerinde mezbûre Zeyneb Hatun’un rub‘ hisse-i şâyi‘asına isâbet eden tûlen iki buçuk zirâ‘ ve arzan dört zirâ‘ ve be-hesâb-ı terbî‘î elli zirâ‘ arsa üzerinde mebnî menzil-i mezkûrun müştemilâtından tabaka-i ulyâda nısf oda ve bir mikdâr dehliz ve bir tahta-pûş ve bir ocak ve tabaka-i vüstâda nısf oda ve bir mikdâr dehliz ve süflâda bir kömürlük ve bir mikdâr açık arsasına alâmât-ı fâsıla vaz‘ıyla bi’t-terâzî ifrâz ve ta‘yîn ve tahsîs edip ve mezbûre Fâtıma Hatun’un üç sehim hisse-i şâyi‘asına isâbet eden ma‘lûmü’l-mikdâr arsa üzerinde mebnî menzil-i mezkûrun müştemilâtından tabaka-i ulyâda bir aded oda ve bir nısf oda ve bir mikdâr dehliz ve bir kenîf ve bir tabaka-i vüstâda bir aded oda ve bir nısf oda ve bir mikdâr dehliz ve bir kenîf ve bir matbah ocağı ve süflâda bir hamam ve câmekân ve bir matbah ve bir kenîf ve bir bodrum ve bi’r-i mâ ve bir mikdâr açık arsasına alâmât-ı fâsıla vaz‘ıyla kezâlik ifrâz ve ta‘yîn ve tahsîs olunup ve taksîm-i mezkûr üzere mezbûre Zeyneb ve mezbûre Fâtıma hatunlar herbiri müfreze-i mahdûde hisselerine ve bedellerine müte‘allika mutâlebesinden fâriğalar olup ve ber-minvâl üzere rızâlarıyla kabz ve kabûl ve herbiri âharın zimmetini ibrâ-i âm ile ibrâ ve ıskāt ve ibrâ-yı mezkûru kabûl ve istifâ-yı hakkı ikrâr edip ve mütevellî-i merkūm Mahmud Efendi taksîm-i mezkûr üzere birinin tasarruflarına izin verdiğini mevlânâ-yı mezbûr mahâllinde ketb ve tahrîr ve gelip alâ-vukū‘ihî inhâ etmeğin mâ-vaka‘a bi’t-taleb ketb olundu. Fî 11 Muharrem sene 1184. Şuhûdu’l-hâl: el-Hâc Hüseyin b. Şa‘ban, Hüseyin b. Ali, Mübâşir Ahmed b. Hüseyin.