İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 75 Hüküm no: 32 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin satın aldığı cariyesiyle ilgili davadan vazgeçtiği Mahrûse-i Galata’da el-Hâc A‘mâ mahallesinde sâkin es-Seyyid Ahmed Efendi b. Ömer nâm kimesne meclis-i şer‘-i şerîf-i enverde işbu bâ‘isü’l-kitâb Ali Bey b. el-Hâc İbrahim mahzarında ikrâr-ı tâm ve takrîr-i kelâm edip mezbûr Ali Bey işbu meclis-i şer‘de mu‘âyene olunup yedinde mâlı olan uzun boylu açık kaşlı kara gözlü Zenciyyetü’l-asl Mâhî nâm bir re’s Arab câriyesini cemî‘ uyûbdan sâlime olmak üzere târih-i kitâbdan bir ay mukaddem iki yüz yirmi beş semen-i medfû‘ ve makbûza bana bey‘ ve temlîk ve teslîm ben dahi ber-minvâl-i muharrer iştirâ ve temellük ve tesellüm [11b] etmişdim lâkin câriye-i mevsûfe-i mezbûrenin belinde illeti olup ve kadîm olmağla ehl-i hibreye ba‘de’l-irâe câriye-i merkūme mezbûr Ali Bey üzerine red ve medfû‘um olan semen-i mezkûru istirdâd murâdımdır deyü taleb ve da‘vâya tesâddî ve bu makūle uyûbu teşhîse kıbel-i Saltanat-ı aliyye’den ehl-i hibre ta‘yîn olunan zeyl-i kitâbda muharrerü’l-esâmî etibbâya irâe olundukda câriye-i mezbûrenin şer‘an reddi iktizâ eder ayb ve illeti olmamağla mezbûra bi’l-muvâcehe haber verdiklerinden mâ‘adâ ben câriye-i mezkûrenin illetini muttali‘ olduğumdan sonra istihdâm edip bu vechile dahi mâni‘-i rücû‘ bulunmuşdu el-hâletü hâzihî ben da‘vâ-yı mezkûremden meccânen fâriğ olup câriye-i merkūmeyi cemî‘ uyûbuyla kabûl edip mebî‘-i mezbûrun tağrîr ve gabnine ve semen-i mezkûra ve bi’l-cümle husûs-ı merkūma müte‘allika âmme-i de‘âvî ve kâffe-i mutâlebâtdan merkūm Ali Bey’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min-ba‘d kendi ile asla ve kat‘a da‘vâ ve nizâ‘ım kalmadı dedikde gıbbe’t-tasdîkı’ş-şer‘î ve’l-kabûlü’l-mer‘î mâ-vaka‘a bi’t-taleb ketb olundu. Fî 28 Muharrem sene 1184. Şuhûdu’l-hâl: Etibbâdan Mehmed Efendi ehl-i hibre b. Musa, Azizoğlu Muhzır Mehmed b. Mehmed, Muhzır Molla İsmail b. Ali, Baltacı el-Hâc Mustafa.