İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 75 Hüküm no: 33 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çizmecibaşı Vekili Hüseyin Usta’nın üç kepenk dükkân gediğini sattığı Terlikci Mahmiye-i İslambol’da Bezzâzistân civârında Acıçeşme kurbünde vâki‘ Beylik Çarşı demekle ma‘rûf çarşıda zenne terliği ve Enderûn-ı hümâyûn için terlik ve tahta papucu diken hâssa terlikci esnâfından Çizmecibaşı vekîli Hüseyin Usta b. el-Hâc Mahmud nâm kimesne meclis-i şer‘-i şerîf-i enverde yine esnâf-ı mezkûreden işbu bâ‘isü’l-kitâb es-Seyyid Mehmed Ali b. Ahmed nâm kimesne mahzarında ikrâr-ı tâm ve takrîr-i kelâm edip mezbûr es-Seyyid Mehmed Ali esnâfımızdan iken mukaddemâ kendiden iştikâ ve esnâfdan ihrâcını ittifâkla iltimâs eylediğimize binâen ol dahi çârşû-yı mezkûrda vâki‘ tasarrufunda olan üç kepenk dükkânı derûnunda mevcûde eşyâsıyla beyne’l-hiref gedik ta‘bîr olunur âlât-ı lâzımesini bâ-hüccet-i şer‘iye bana bey‘ ve temlîk ve dükkân-ı mezkûrdan çıkıp bana teslîm etmişidi el-hâletü hâzihî mezbûr es-Seyyid Mehmed Ali ile beynimiz tevfîk ve ıslâh olunup ber-mûceb-i i‘lâm-ı şer‘î mezbûr es-Seyyid Mehmed Ali’yi bi’l-cümle esnâf ittifâkıyla yine dükkân-ı mezkûra iskân ve san‘at-ı mezkûre işlemeğe mübâşeret etmekle ben dahi ber-mûceb-i hüccet-i şer‘iye dükkân-ı mezkûrun gedik ta‘bîr olunur yedimde mâlım olan bir ağaç destgâh iskemle ve sagīr ve kebîr çift ağaç kalıb ve yirmi demir bıçak ve bir tuç muşta ve bir summâkī mermer ve bir bağ bileği ve iki ağaç piştahta ve elli dirhem bir kurşun ve bir sagīr çiriş taşı ve üç çift şemşîr kat ve dört ağaç mıskala ve muşta ve iki demir iş kalemi ve bir köhne iskemle minderi ve kâğıd endâzemi ber-mûceb-i defter sâir âlât-ı lâzıme-i ma‘lûmemi safka-i vâhide ile tarafeynden îcâb ve kabûlü hâvî şürût-ı müfside ve muvâza‘adan ârî bey‘-ı kat‘î ile mezbûr es-Seyyid Mehmed Ali’ye yüz seksen yedi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr yüz seksen yedi guruş mezbûr es-Seyyid Mehmed Ali yedinden tamamen ahz u kabz edip bey‘-ı mezkûrun tağrîr ve gabnine ve istifâ-i semene ve gedik husûsuna ve sâir târih-i kitâba gelince [12a] beynimizde cereyân eden hukūk-ı şettâya ve cemî‘ hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ-i âmm-ı sahîh ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm dükkân-ı mezkûr derûnunda mevcûde eşyâ-i muharrere-i mezkûre ve bi’l-cümle sâir âlât-ı lâzıme merkūm es-Seyyid Mehmed Ali’nin mülk-i müşterâsı ve hakk-ı sırfı olup eşyâsında ve gediğinde kat‘a benim alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurret-i Saferü’l-hayr sene 1184. Şuhûdu’l-hâl: Mustafa Usta b. Ali, Salih Usta b. Mustafa, Mehmed Usta b. Abdullah, Mehmed Çelebi b. el-Hâc Ali, Ahmed Usta b. Ali, İsmail b. Mehmed, Hasköylü Molla Hüseyin b. Mehmed, Mehmed b. el-mezbûr Molla Hüseyin, es-Seyyid İsmail b. Mustafa, Kethudâ el-Hâc Abdurrahman, Mehmed b. Ali.