İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 76 Hüküm no: 34 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lüleci Molla İsmail’in Vize’den getirdiği lüle toprağını nizâma aykırı olarak pahalıya satmayacağına söz verdiği Lülecilerin toprak nizâmı Âsitâne-i aliyye’de lüleci esnâfından kethudâları Nigâhî es-Seyyid Hüseyin Dede ve Yiğitbaşı Mehmed Usta ve el-Hâc Mustafa ve el-Hâc Mehmed ve Tepel Osman ve Osman Odabaşı ve Mehmed Usta ve sâirleri ile mahrûse-i Galata muzâfâtından kasaba-i Tophâne’de lüleci esnâfından kethudâları Mehmed Usta ve Yiğitbaşı Molla Mehmed ve el-Hâc Mehmed ve Amuca Mustafa ve Ahmed Usta ve Abdi Usta ve Mahmud Usta ve es-Seyyid Mustafa ve diğer Ahmed Usta ve Mustafa Usta ve Hasan Usta ve İbrahim Usta ve el-Hâc Hasan ve sâirleri meclis-i şer‘-i şerîf-i enverde yedi aded kârhâneye mahsûs toprak süzücü ustalardan el-Hâc Ahmed [b.] Molla Ahmed ve Molla Mehmed ve es-Seyyid Mustafa ve el-Hâc Mustafa nâm kimesneler ile İstefan zimmî hazırlar oldukları hâlde lüleci esnâfından Molla İsmail b. Mehmed Said nâm kimesne mahzarında herbiri takrîr-i kelâm ve ifâde-i merâm edip lüle yapmak için bize mahsûs Vize toprağını hirfetimiz erbâbından bir kimesne varıp getirir ise yüz vakıyyesini yüz akçeye ecânibden bir kimesne getirir ise yüz vakıyyesini doksan akçeye harc işi lüle san‘atı için ashâb-ı kârhâne süzücü esnâfı hâzırûn-ı mezbûrûna verip ve kalıb işi lüle san‘atı için işleyen ustalara verip minvâl-i muharrer üzere beynimizde bey‘ ü şirâ olunup ve gelen toprağın nısfını İstanbul’da olan hirfet-i mezbûre erbâbına ve nısf-ı âharını Tophâne’de olan hirfet-i mezbûre erbâbına kethudâlar ma‘rifetiyle verilmek nizâm-ı kadîmimizden olup ve bu nizâmın hilâfına hirfetimiz erbâbından birimiz hareket eylememek üzere ve nizâm-ı mezkûr beynimizde ale’d-devam mürâ‘ât olunagelmek üzere herbirimiz ta‘ahhüd ve işbu şürût-ı nizâmı hâvî Tophâne ustaları yedinde bir kıt‘a nizâm hücceti dahi var iken mezbûr Molla İsmail bu esnâda Vize’den getirdiği toprağı hilâf-ı muâhede ve mugāyir-i hüccet ziyâdeye bey‘e tesâddî ve esnâf beyninde [12b] nizâ‘a bâ‘is ve bâdî olur deyü iştikâ eylediğimizde ol dahi nizâm-ı kadîmimiz vech-i meşrûh üzere olduğunu ikrâr ve ber-minvâl-i muharrer getirdiği toprağı bize bey‘e ta‘ahhüd ve râzı oldukda biz dahi şikâyetimizden fâriğler olup ve zikrolunan toprağı ba‘de’l-ahz nizâm-ı kadîmimiz üzere nısfiyet üzere beynimizde tevzî‘ ve taksîme ta‘ahhüd eylediğimizden sonra bâlâda tahrîr olunduğu minvâl üzere fîmâ-ba‘d dahi ke’l-evvel sâlifü’l-beyân Vize’den gelen toprağı hirfet-i mezbûreden getiren yüz kıyyesini yüz akçeye ve ecânibden getiren yüz vakıyyesini doksan akçeye beynimizde bey‘ ü şirâ olunup ve gelen toprağı dahi nısfiyet üzere kethudâsı ma‘rifetleriyle hirfetimiz erbâbına verilip muhîll-i nizâm-ı kadîm hareket etmeyip işbu şürût-ı nizâm beynimizde ale’d-devam mer‘î ve mu‘teber tutulmak üzere müceddeden herbirimiz ahd ü mîsâk ve kavl ü ittifâk eyledik dediklerinde süzücü ustaları hâzırûn-ı merkūmûn ile mezbûr Molla İsmail dahi lüleci esnâfı mukırrûn-ı mezbûrûnu vicâhen ve şifâhen tahkīk ve tasdîk etmeleriyle vâki‘ hâli hıfzan li’l-makāl bi’t-taleb ketb olundu. Fî 4 S sene 1184. Şuhûdu’l-hâl: Molla İsmail b. Ali, Muhzır Ali Çelebi b. Abdullah, Baltacı el-Hâc Mustafa b. Hüseyin, Azizoğlu Mehmed b. el-Hâc Mehmed, Muhzır Mustafa b. Ahmed.