İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 78 Hüküm no: 35 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Ohan’ın Lefkoşa Nâibi Osman Efendi’de olan alacağı hususunda vârisiyle sulh olduğu Mahmiye-i İslambol’da Lanka civârında vâki‘ Mirâhur Hamamı kurbünde Tütüncü Ohan v. Ariton nâm zimmî meclis-i şer‘-i şerîf-i enverde müderrisîn-i kirâmdan olup bundan akdem Kıbrıs cezîresinde Lefkoşa kazâsı nâibi olduğu hâlde bundan akdem vefât eden Osman Efendi b. Halil Efendi’nin sulbî kebîr oğlu işbu bâ‘isü’l-kitâb Molla Mehmed Said mahzarında ikrâr-ı tâm ve takrîr-i kelâm edip işbu yedimde olan bir kıt‘a temessük nâtık olduğu üzere müteveffâ-yı merkūm Osman Efendi zimmetinde cihet-i karzdan yüz yirmi guruş alacak hakkım olup ve meblağ-ı mezbûr yüz yirmi guruşa oğlu işbu merkūm Molla Mehmed Said kefîl ve zâmin olmağla meblağ-ı mezbûr yüz yirmi guruş kefâletine binâen merkūm Molla Mehmed Said’den bu esnâda taleb ve da‘vâ eylediğimde beynimizde ba‘de vukū‘ı’l-münâza‘a tavassut-ı muslihîn ile da‘vâ-yı mezkûremden merkūm Molla Mehmed Said ile altmış guruş üzerine sulh olup bedel-i sulh-ı mezkûr altmış guruşu işbu meclis-i şer‘de merkūm Molla Mehmed Said yedinden bi’t-tamam ve’l-kemâl ahz u kabz edip mâ‘adâsı olan altmış guruşa ve bi’l-cümle husûs-ı mezkûra ve târih-i kitâba gelince cemî‘ hukūk ve sâireye müte‘allika âmme-i de‘âvî ve kâffe-i mutâlebâtdan mezbûr Molla Mehmed Said ile vâlidesi gāibe ani’l-meclis Emetullah nâm hatundan herbirinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip ol dahi ibrâyı kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Saferü’l-hayr sene [1]184. Şuhûdu’l-hâl: Vekîl-i Kethudâ-yı Muhzırân Mehmed Ağa, Abdullah Ağa b. el-Hâc Ahmed, es-Seyyid Molla Ahmed b. es-Seyyid Mehmed Said, Molla İsmail b. Ali.