İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 78 Hüküm no: 36 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un bir fırın ve değirmendeki gedik hissesini sattığı Mahmiye-i İslambol’da Sultân Bâyezid’de Yahni Kapan sokağında sâkine Fâtıma Hatun bt. el-Hâc Hüseyin Efendi b. Ahmed tarafından vech-i âtî üzere vekîl olduğu zâtını ârifân Molla Mustafa b. el-Hâc Mehmed ve Molla Osman b. Mustafa nâm kimesneler şehâdetleriyle sâbit olan el-Hâc Ahmed b. İbrahim nâm kimesne meclis-i şer‘-i şerîf-i enverde müvekkile-i mezbûrenin [13a] sadrî kebîr oğlu işbu bâ‘isü’l-kitâb Molla Nu‘man b. el-Hâc Mustafa mahzarında bi’l-vekâle ikrâr ve takrîr-i kelâm edip mahmiye-i mezbûrede Simkeşhâne kurbünde vâki‘ Simkeşhâne Fırını demekle ma‘rûf bir bâb kebîr ekmekçi fırını ve ona merbût Unkapanı’nda vâki‘ beş horoslu ve yine Unkapanı’nda kâin üç horoslu ve Kumkapı’da kâin üç horoslu ki cem‘an üç bâb değirmenlerde mevcûde gedik ta‘bîr olunur kırk dört re’s bargir ile sâir ber-mûceb-i defter âlât-ı lâzıme ve eşyâ-i ma‘lûmenin dört sehmine isâbet eden on re’s bargir ile eşyâ-i ma‘lûmeleri müvekkilem mezbûre Fâtıma Hatun’un bâ-hücceti yedinde mâlı ve mülkü olmağla müvekkilem mezbûre Fâtıma Hatun zikrolunan on re’s bargirleri âlât-ı lâzıme ve eşyâ-i ma‘lûmeleriyle tarafeynden îcâb ve kabûlü hâvî şurût-ı müfsideden ârî bey‘-ı kat‘î ve safka-i vâhide ile oğlu mezbûr Molla Nu‘man’a iki bin guruşa bey‘ ve temlîk ve lâyıkı üzere teslîm eylediğinde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr iki bin guruşu oğlu mezbûr Molla Nu‘man yedinden tamamen ahz u kabz edip bey‘-ı mezbûrun gabn ve tağrîrine ve istifâ-i semenine müte‘allika âmme-i da‘vâdan oğlu mezbûr Molla Nu‘man’ın zimmetini ibrâ ve ıskāt ol dahi ibrâyı kabûl etmeğin fîmâ-ba‘d mârrü’z-zikr fırın ve üç bâb değirmenler derûnlarında mevcûd bargir ve bi’l-cümle sâir âlât-ı lâzıme ve eşyâ-i ma‘lûmenin dört sehmine isâbet eden on re’s bargirler[i] âlât-ı lâzıme ve eşyâ-i ma‘lûmeleriyle mezbûr Molla Nu‘man’ın mülk-i müşterâsı ve hakk-ı sırfı olup müvekkilem mezbûre Fâtıma Hatun’un kat‘a alâka ve medhali kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 S sene 1184. Şuhûdu’l-hâl: Kethudâ Ali Ağa b. Abdullah, Yiğitbaşı Molla Osman, Salıcı Molla Osman, Kanlıfırın Ustası Molla Ahmed b. Hüseyin, Sofular Ustası Molla Mustafa, Hasan Beşe b. Ahmed, Abdullah Beşe b. Abdullah, Ahmed Beşe b. Mehmed, el-Hâc Ahmed b. İbrahim, İbrahim b. Ali.