İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 79 Hüküm no: 37 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizâma aykırı hareket eden ekmekçilerin gediklerinin başkasına verildiği Mahmiye-i İstanbul ve tevâbi‘inde vâki‘ ekmekçi esnâfı dâimâ tâmmü’l-vezn nân-ı azîz işleyip ve mutasarrıf oldukları gediklerini âhara bey‘ ve îcâr ve i‘âre murâd eylediklerinde kethudâları ve nizâm ustaları ma‘rifetiyle müşteri ve müste’cirleri mu‘temed ve mütemevvil ve fırını idâreye kādir olup ve vech-i muharrer üzere olan bey‘ ve îcârları cümle ma‘rifetiyle ve nizâm ustaları kefâletiyle İslambol kādıları huzûrunda tescîl olunmak nizâm-ı kadîmlerinden olup ve bundan akdem sene evvelinde mahsûl-i cedîdin bahâları kat‘ olundukda ve ba‘dehû birkaç def‘a da bi’l-cümle ekmekçi tâifesi min-ba‘d fırınlarında tabh eyledikleri nân-ı azîzi hâs ve beyâz ve tabhı nisâbında tâmmü’l-vezn işlemek üzere ta‘ahhüd ve eğer hilâf-ı ahd-i mezkûr nân-ı azîzler narh-ı rûzîsinden noksan tabh ederler ise mutasarrıf oldukları fırın ve değirmen gedikleri âhara ta‘yîn olunmağa râzı ve ber-vech-i muharrer ta‘ahhüd ve rızâları meclis-i şer‘de bi’d-defa‘ât tescîl olunmuşiken İslambol’da Mesîh Paşa Câmi‘-i şerîfi kurbünde Ali Paşa Çarşısı’nda vâki‘ ekmekçi fırınında ekmekçi olan Cafer b. Ali ve şerîkleri Sinan b. Yusuf ve İsmail b. Mehmed nâm kimesneler tabh eyledikleri nân-ı azîzi narh-ı rûzîsinden beher paralıkda kırk ve kırk beş dirhem ve dahi ziyâde noksan işlemeleriyle nizâm-ı kadîmlerinin [13b] ve rızâlarıyla eyledikleri uhûd ve şürûtun hilâfına hareket eyledikleri lede’ş-şer‘i’l-enver zâhir ve nümâyân olduğuna binâen merkūmûn Cafer ve Sinan ve İsmail’in mutasarrıf oldukları mârrü’z-zikr fırın ile ittisâlinde vâki‘ fırın-ı mezkûra merbût beş horoslu değirmen gedikleri âhara ta‘yîn olunmak iktizâ etmekle binâenaleyh zikrolunan fırın ve değirmen gedikleri mutasarrıfları merkūmûn Cafer ve Sinan ve İsmail yedlerinden nez‘ ve mezbûrûnun değirmen-i mezbûrda mevcûde gedik ta‘bîr olunan yirmi re’s bargirin beher re’sini semen-i mislinden ziyâde olduğu kethudâları ve nizâm ustaları ihbârlarıyla zâhir olan ellişer guruşdan cem‘an bin guruş mukābelesinde fırınları ve değirmen-i mezkûru işbu râfi‘u’l-kitâb Ferhad b. Ali’ye kethudâları ve nizâm ustaları ma‘rifetleriyle Sarıgez (Sarıgörez) Fırını Ustası Abdullah b. Mustafa ve Sarrâchânebaşı Fırını Ustası Hasan b. Ahmed kefâletleriyle ta‘yîn ve nizâm-ı kadîmleri üzere meblağ-ı mezbûr bin guruşu mezbûrûn Cafer ve Sinan ve İsmail’in cânib-i mîrîye ve kapan tüccârına olan deynlerini ashâbına edâ ve fazlasını kendilere îsâle mezbûr Ferhad kayyım nasb olundukda ol dahi kabûl eyledikden sonra mezbûr Ferhad şürût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ ve hareket etmemek üzere ta‘ahhüd etmeğin vâkı‘u’l-hâl hıfzan li’l-makāl bi’l-ibtigā ketb ü imlâ olundu. Fî 12 Safer sene 1184. Şuhûdu’l-hâl: Kethudâ Ali Ağa b. Abdullah, Yiğitbaşı Molla Osman, Salıcı Molla Osman, Kanlıfırın Ustası Ahmed, Sofular Ustası Molla Mustafa.