İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 80 Hüküm no: 38 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İğneci esnafı kethudâlığına Mustafa Usta’nın tayin olunduğu Mahmiye-i İstanbul’da vâki‘ sûzenici esnâfından es-Seyyid Hüseyin Çelebi ve Mustafa Usta ve İsmail usta ve Ali Usta ve İbrahim Usta ve Hüseyin Usta ve Ömer Usta ve Molla Salih nâm kimesneler ile zimmî ustalarından Avanis ve Ariton ve Hudâverdi ve Kazer ve Karabet nâm zimmîler ve sâirleri meclis-i şer‘-i şerîf-i enverde esnâf-ı mezkûreden Esirpazarı kurbünde Horosötmez hitânında işbu bâ‘isü’l-kitâb es-Seyyid Mustafa Usta b. Üveys hazır olduğu hâlde herbiri takrîr ve ifâde-i merâm edip esnâfımızın kethudâsı olan el-Hâc Mehmed fevt olup yeri hâlî ve mu‘attal kalmağla umûrumuzu rü’yet eder bir kimesne kethudâ nasb olunmak lâzım ve mühim olmağla müteveffâ-yı mezbûrun yerine ustalarımızdan cümlemizin mu‘temed ve muhtârı ve her vechile umûrumuzu rü’yet ve [tesviyeye] iktidârı olan işbu merkūm es-Seyyid Mustafa Usta kıbel-i şer‘den üzerimize kethudâ nasb olunmak matlûbumuzdur dediklerinde bâlâ-yı kitâbı tevkī‘-i müstetâbı ile tezyîn eden hâkim-i hâsim-i vâlâ-cenâb efendi hazretleri merkūm es-Seyyid Mustafa Usta’yı müteveffâ-yı mezbûr yerine esnâf-ı mezkûre üzerlerine talebleriyle kethudâ nasb ü ta‘yîn ve umûr-ı mu‘tâdelerini alâ-vechi’l-istikāme rü’yet etmek üzere tenbîh buyurduklarında ol dahi kabûl ve kadîmî üzere hizmet-i lâzımesini edâya müte‘ahhid olmağın mâ-vaka‘a bi’t-taleb ketb ü terkīm olundu. Fî 17 Safer sene 1184. Şuhûdu’l-hâl: Mehmed Ağa vekîl-i kethudâ-yı muhzırân, Ali Çelebi b. Abdullah, Azizoğlu Mehmed, el-Hâc Mustafa.