İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 81 Hüküm no: 39 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un muhâlaa yoluyla Çorbacı Mehmed Hamid Ağa’dan boşandığı Medîne-i Üsküdar’da Vâlide-i atîk mahallesinde sâkine Nefîse bt. el-Hâc Mehmed b. Mahmud nâm hatun tarafından ber-vech-i âtî hul‘ ve ibrâya vekîl olduğu zât-ı mezbûreyi ârifân Molla Mustafa b. İbrahim ve diğer Molla Mustafa b. Yusuf nâm kimesneler şehâdetleriyle sâbit olan eş-Şeyh el-Hâc İsmail Efendi b. Keşfî el-Hâc İbrahim Efendi meclis-i şer‘-i şerîf-i enverde müvekkile-i mezbûrenin zevc-i dâhilî işbu bâ‘isü’l-kitâb Çorbacı Mehmed Hamid Ağa b. Feyzullah mahzarında bi’l-vekâle ikrâr ve takrîr-i kelâm edip merkūm Mehmed Hamid Ağa müvekkilem mezbûre Nefîse Hatun’un zevc-i dâhilî olup beynlerinde hüsn-i imtizâcları olmamağla zevci merkūm Mehmed Hamid Ağa’nın zimmetinde mütekarrir ve ma‘kūdün-aleyh olan yüz guruş mehr-i müecceli ile nafaka-i iddet-i ma‘lûmesi üzerlerine ve meûnet-i süknâsı dahi müvekkilem mezbûrenin kendi üzerine olup ve mâlından medfû‘u olan altmış guruş dahi bedel-i hul‘ olmak üzere zevci merkūm Mehmed Hamid Ağa ile ben bi’l-vekâle muhâla‘a-i sahîha-i şer‘iye ile hul‘ eylediğimde ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve ma‘lûm ve mechûl bi’l-cümle sâir hukūk-ı şer‘iyeye müte‘allika âmme-i de‘âvî ve kâffe-i mutâlebâtdan ben bi’l-vekâle merkūm Mehmed Hamid Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete ve bi’l-cümle hukūk-ı sâireye müte‘allika âmme-i da‘vâdan müvekkilem mezbûre Nefîse’nin zimmetini ibrâ-i âm ile ibrâ ve ıskāt ve herbirimiz asâleten ve vekâleten âharın ibrâsını kabûl eyledik eğer ba‘de-zamanin müvekkilem mezbûre Nefîse mehr-i mezkûreyni ve bedel-i hul‘-ı merkūmu vekâleti inkâr ile zevci merkūmdan da‘vâ ve şer‘an bir nesne ahz ederse me’hûzuna kefîl ve zâmin oldum dedikde merkūm Mehmed Hamid Ağa dahi vekîl-i mukırr-ı merkūm eş-Şeyh el-Hâc İsmail Efendi’yi kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî 20 Safer sene 1184. Şuhûdu’l-hâl: Ali Çelebi b. Abdullah, Muhzır Mustafa b. Ahmed, el-Hâc Mustafa, Araboğlu Mehmed b. el-Hâc Mehmed, Molla Mustafa b. İbrahim.