İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 82 Hüküm no: 40 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Makas lülecileri esnafının Vize’den getirdikleri lüle toprağını kendilerinin süzüp işlemelerine engel olunmaması Mahmiye-i İslambol’da makas lülesi işleyen lüleci esnâfından Osman Odabaşı ve el-Hâc Mehmed Ağa ve Derviş Süleyman ve es-Seyyid Halil Ağa ve el-Hâc Mehmed oğlu Ahmed ve Derviş Hüseyin ve Araboğlu Mehmed Beşe ve Derviş Abdullah ve Bölükbaşı Osman ve Mustafa Beşe ve Mehmed Emin ve Arabacı Mehmed Beşe ve Salih Beşe vesâirleri meclis-i şer‘-i şerîf-i enverde lüleci esnâfının kethudâları Nigâhî es-Seyyid Hüseyin Dede ile sâirleri muvâcehelerinde vilâyet-i Rumeli’de Vize kazâsından gelip Âsitâne-i aliyye’de yedi aded kârhâne[de] süzülen toprakdan esnâfımız erbâbı lüle işleyegelip lâkin zikrolunan yedi aded kârhânede süzülen lüle çamuru esnâfımız erbâbı kesîr olmağla kifâyet etmediğinden mâ‘adâ ashâb-ı kârhâne bizlere ziyâde bahâ ile bey‘ edip ol vechile esnâfımız erbâbı mutazarrır olup ve kâr ü kisbimizin kılletine [14b] bâdî ve ta‘ayyüşümüzün müzâyaka ve zarûretine bâ‘is olmağla mârrü’z-zikr Vize’den gelen toprağı kifâyet edecek mikdârı kendimiz süzüp işlemek üzere beynimizde nizâm ve nizâm-ı merkūm düstûrü’l-amel murâd eylediğimizde kethudâ-yı mezbûr Nigâhî Dede ile sâirleri mümâna‘at edip ve mârrü’z-zikr toprağı ziyâde bahâ ile bey‘ murâd etmekle mümâna‘atları men‘ u def‘ olunmak matlûbumuzdur deyü herbiri iştikâ eylediklerinde kethudâ-yı merkūm ile sâirleri dahi cevâblarında Vize’den gelen toprağı hirfetimiz erbâbından yüz vakıyyesini yüz akçeye ve ecânibden getiren kimesneler yüz vakıyyesini doksan akçeye beynimizde bey‘ ü şirâ olunup ve gelen toprağın nısfını İstanbul’da olan Lülecilere ve nısf-ı âharını Tophâne’de olan Lülecilere kethudâlar ma‘rifetiyle verilip ve harc işi lüle san‘atı için ashâb-ı kârhâne süzücü esnâfından alıp ve kalıb işi lüle san‘atı için işleyen ustalar kendiler alıp beynimizde bu vechile bey‘ ü şirâ olunagelip nizâm-ı kadîmimiz bu vech üzere cârîdir deyü mümâna‘atlarını ikrâr edip lâkin bir kimesnenin kâr u kisbine mümâna‘at etmek meşrû‘ olmamağla ber-minvâl-i muharrer makas lülecileri esnâfı mezbûrûnun zikrolunan toprağı kendiler süzüp ol vechile kâr u kisblerine mümâna‘at etmemek üzere kethudâ-yı mezbûr Nigâhî es-Seyyid Hüseyin Dede’ye tenbîh birle mâ-vaka‘a bi’t-taleb ketb olundu. Fî 17 Safer sene 1184. Şuhûdu’l-hâl: Molla İsmail b. Ali, Azizoğlu Mehmed b. el-Hâc Mehmed, Ali Çelebi b. Abdullah, Baltacı el-Hâc Mustafa b. Hüseyin.