İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 86 Hüküm no: 43 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çizme dikici ustaları yanında çalışan ve senesini doldurmadan özürsüz olarak işten ayrılan veya kovulan kalfalara âdilâne muamelede bulunulması Mahmiye-i İslambol’da Mercan sûkunda Bulgar çizmesi dikici esnâfının kalfalarından olup kendi nefslerinden asîl ve sâir ma‘lûmü’l-esâmî kalfalar taraflarından vech-i âtî üzere vekîl-i sâbitü’l-vekâleleri olan Dimo v. Atanaş ve Nikola v. Ustoyan ve Ustoyan v. Danyel nâm zimmîler meclis-i şer‘-i şerîf-i enverde esnâf-ı mezkûre ustalarından işbu ashâbü’r-rakīm kethudâları Sava v. Rabil ve Simo v. Andreya ve Yuvan v. İstavri ve Marko v. Yuvan ve Kiryako v. Ustoyan ve Hristo v. İstoyko ve Mosko v. Yorgo ve Hristo v. Yani ve sâirleri muvâcehelerinde Dikicibaşı es-Seyyid el-Hâc Ahmed Ağa ile Başyiğitbaşı Sahak v. Parnak hazırlar oldukları hâlde herbiri bi’l-asâle ve bi’l-vekâle takrîr-i kelâm ve bast-ı merâm edip bizleri minvâl-i muharrer Mercan sûkunda Bulgar çizmesi işler kalfalardan herbirimiz esnâf-ı mezkûre ustalarına senevî ücret-i ma‘lûme ile yanlarında san‘at-i mezkûrede kalfalık işlenip lâkin bazı kalfalar senesini tamam etmeksizin ustasından müfârakat ve ücretinden ferâğ etmeleriyle ihtilâf ve ihtilâle bâdî olmuşidi el-hâletü hâzihî fîmâ-ba‘d kalfalardan herbirimiz senevî ücret-i ma‘lûme ile yanında işlediğimiz ustamızdan min-gayrı özr-i şer‘î müfârakat edersek mukāvele olunan ücretin nısfından kıstıyla hesâb olunup ziyâde mutâlebesiyle rencîde olunmayıp ve eğer usta olan kimesne yanında olan kalfasını kezâlik min-gayrı özr-i şer‘î yanından tard ve ihrâc ederse mukāvele olunan ücretin tamamından kıstıyla hesâb olunup noksan teklîfiyle rencîde ve ızrâr olunmamak üzere herbirimiz müceddeden [16b] ahd ü mîsâk ve kavl ü ittifâk edip işbu şurût-ı nizâm beynimizde ale’d-devam mer‘î ve mu‘teber tutulup gerek kalfalardan ve gerek ustalardan bir ferd hilâf-ı mu‘âhede ve mugāyir-i nizâm hareket etmemek üzere dahi ta‘ahhüd eyledik dediklerinde san‘at-ı mezkûre ustaları mezbûrûn ile dikicibaşı ve başyiğitbaşı hâzırân-ı merkūmândan herbiri mukırrûn-ı mersûmûnu kelimât-ı meşrûhalarında vicâhen ve şifâhen tahkīk ve tasdîk etmeleriyle mâ-vaka‘a bi’t-taleb ketb olundu. Fî 26 Safer sene 1184. Şuhûdu’l-hâl: Hacı Halil b. Hacı Abdülcelil, Hasan Ağa b. Mehmed Ağa, Emir Mustafa b. Ebûbekir, es-Seyyid Mehmed b. Abdullah, İbrahim b. Abdullah, Ali Ağa b. Abdullah.