İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 86 Hüküm no: 44 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ali’nin Mustafa Efendi’de olan alacağı hususunda vârisleri ile elli kuruş üzerine sulh olduğu Medîne-i Üsküdar’da Kolluk karşısında el-Hâc Mustafa Fırını demekle ma‘rûf ekmekçi fırını ustası Ali b. el-Hâc Mehmed nâm kimesne meclis-i şer‘-i şerîf-i enverde bundan akdem vefât eden müderrisîn-i kirâmdan Dülbendcizâde el-Hâc Mustafa Efendi b. el-Hâc Mehmed’in verese-i münhasırası işbu bâ‘iseyi’l-kitâb zevce-i menkûha-i metrûkesi mu‘arrefetü’z-zât Hadîce bt. Abdullah ile usûbet-i nesebiye cihetinden ammizâdesi İbrahim b. İsmail’in oğlu ve tarafından vech-i âtî üzere vekîl-i şer‘îsi olan Hâfız Molla İsmail nâm kimesne mahzarında ikrâr-ı tâm ve takrîr-i kelâm edip sâlifü’z-zikr ekmekçi fırını müteveffâ-yı merkūm el-Hâc Mustafa Efendi’nin hayatında tasarrufunda ve ben derûnunda müste’cir iken fırın-ı mezkûrun iktizâ eden ta‘mîrâtına müteveffâ-yı merkūmun bi-şarti’r-rücû‘ emriyle hayatında mâlımdan iki yüz yetmiş altı guruş harc u sarf edip ba‘dehû masrûf-ı mezkûrumu kable’l-ahz ve’l-istifâ merkūm el-Hâc Mustafa Efendi fevt olup tereke-i vâfiyesine hasran vârisleri olan zevcesi mezbûre Hadîce Hatun ile ammizâdesi müvekkil-i mezbûr İbrahim Ağa bi’l-verâse vâzı‘eyi’l-yed olmalarıyla masrûf-ı mezkûrumu bu esnâda mezbûrândan taleb ve da‘vâ eylediğimde onlar dahi inkâr edip bu vechile beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassutuyla zevce-i mezbûre Hadîce Hatun ve müvekkil-i mezbûr İbrahim Ağa ile elli guruş üzerine sulh olup bedel-i sulh-ı mezkûr elli guruşu tereke-i müteveffâ-yı mezbûrdan veresesi zevce-i mezbûre Hadîce Hatun ile müvekkil-i mezbûr İbrahim Ağa yedlerinden tamamen ahz u kabz edip mâ‘adâsına ve bi’l-cümle husûs-ı mezkûra müte‘allika amme-i de‘âvî ve kâffe-i mutâlebâtdan zevce-i mezbûre Hadîce Hatun ile müvekkil-i mezbûr İbrahim Ağa ve oğlu vekîl-i mezbûr Molla İsmail’den herbirinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi ibrâyı kabûl eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Safer sene 1184. Şuhûdu’l-hâl: Ekmekciler Kethudâsı Ali Ağa, Salıcı Molla Osman, Yiğitbaşı Molla Osman, Kanlıfırın Ustası Ahmed Ağa.