İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 87 Hüküm no: 45 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un muhâlaa yoluyla Haffâf Halil’den boşandığı Mahmiye-i İslambol’da Çıkrıkçı Kemâl mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Ümmühani bt. İbrahim nâm hatun meclis-i şer‘-i hatîr-i lâzımü’t-tevkīrde zevc-i muhâlı‘ı bâ‘isü’l-vesîka Haffâf Halil b. İbrahim nâm kimesne mahzarında ikrâr-ı tâm ve takrîr-i kelâm edip merkūm Halil zevc-i dâhilim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan yirmi beş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Haffâf Halil ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete ve bi’l-cümle ibtidâ-i zevciyetden târih-i kitâba gelince beynimizde cereyân eden cemî‘ ahz u i‘tâ ve mu‘âmelât-ı şettâ ve sâir hukūk-ı şer‘iyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan herbirimiz âharın zimmetini ibrâ ve ıskāt ve herbirimiz âharın ber-vech-i [muharrer] ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Saferü’l-hayr li-sene erba‘a ve semânîn ve mie ve elf. Şuhûdu’l-hâl: Kethudâ el-Hâc Seyfullah b. Ali, İmâm Feyzulluh Efendi b. Ahmed, Kahveci İbrahim b. Ahmed, Bekci Hüseyin b. Hüseyin, Mehmed b. Ali.