İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 88 Hüküm no: 46 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarrâf Kigork’un kızı Serifi’nin Şeyhferhad mahallesindeki menzilini Meryem Ana Kilisesi Vakfı’na sattığı Mahmiye-i İslambol’da Şeyhferhad mahallesinde sâkine ve şahsı ta‘rîf-i şer‘î ile mu‘arrefe olan Serifi bt. Sarrâf Kigork nâm Nasrâniye meclis-i şer‘-i şerîf-i enverde mahalle-i mezbûre kurbünde Cerrâh İshak mahallesinde vâki‘ Meryem Ana Kenîsesi avârızı vakfının mütevellîsi ve hâsıla olan gallenin ziyâ‘ ihtimâline binâen akāra tebdîline me’zûn olan işbu bâ‘isü’r-rakīm Agop v. Melkon nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülküm olup mârrü’z-zikr Şeyhferhad mahallesinde vâki‘ bir tarafdan İrmi Nasrâniye menzili ve bir tarafdan Bogos Kalfa menzili ve bir tarafdan Hanımoğlu Sarrâf Melcan menzili ve bir tarafdan tarîk-i âm ile mahdûd tûlen ve arzan be-hesâb-ı terbî‘î yüz doksan zirâ‘ arsada mebnî ulyâda bir cihân-nümâ ve bir bâb oda ve bir köşk ve dehliz ve âbdesthâne ve kenîf ve vüstâda bir bâb oda ve matbah ve âbdesthâne ve kenîf ve dehliz ve süflâda bodrum ve kenîf ve vüstâ hizâsında bir mikdâr bahçe ve su kuyusu ve süb‘ masûra mâ’-i lezîz-i cârîyi muhtevî mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî bey‘-ı bâtt-ı sahîh-i şer‘î ile vakf-ı mezbûr için mütevellî-i mersûm Agop zimmîye iki bin beş yüz guruşa bey‘ ve teslîm eylediğimde ol dahi ber-vech-i muharrer iştirâ ve tesellüm eyledikden sonra semeni olan meblağ-ı mezkûrun dört yüz elli guruşunu galle-i vakf-ı mezbûrdan mütevellî-i mersûm yedinden ahz u kabz edip menzil-i mezkûr vakf-ı merkūm müstegallâtından oldukdan sonra mütevellî-i mersûm Agop bir kıt‘a temessük mantûkunca menzil-i mezkûru iki bin elli guruş icâre-i mu‘accele ve yevmî bir buçuk akçe icâre-i müeccele ile cânib-i vakıfdan bi’t-tevliye bana îcâr ve teslîm ve semenden bâkī iki bin elli guruşu icâre-i mu‘accele-i mezkûre iki bin elli guruşa takās ve mahsûb eyledikden sonra ben dahi ber-minvâl-i muharrer istîcâr ve tesellüm ve mukāssa ve kabûl edip bey‘-ı mezkûrun tağrîr ve gabnine ve mu‘accele-i mezkûrenin adem-i istifâsına müte‘allika âmme-i da‘vâdan cânib-i vakfı ve zimmet-i mütevellî-i mersûmu ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Safer sene 1184. Şuhûdu’l-hâl: Mehmed Ağa b. Ahmed vekîl-i kethudâ-i muhzırân, Ali Çelebi b. Abdullah, el-Hâc Mustafa b. Hasan, Molla İsmail b. Ali, Papa Avadik v. ( ), Papa Sekyas v. ( ), Papa Kirkor v. ( ), Papa Haçador v. ( ), Mıgırdıç v. Bedros.