İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 89 Hüküm no: 47 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lübabe Hatun’un tasarrufunda bulunan vakıf manav dükkânını kiracısı olan Halil’in ölmesi üzerine merhûmun kızları Rukiye ve Hadice’ye kiraladığı Mahmiye-i İslambol’da Bahçekapısı kurbünde Hobyar mahallesinde sâkine Sadr-ı esbak merhûm Abdullah Paşa halîlesi Lübâbe Hatun bt. Abdullah tarafından husûs-ı âti’l-beyânda vekîl olduğu zâtını ârifân Feyzullah Efendi b. Abdullah ve Ali Ağa b. Abdullah nâm kimesneler şehâdetleriyle sâbit olan Mustafa Ağa b. Abdülkadir meclis-i şer‘-i şerîf-i enverde zâtları ta‘rîf-i şer‘î ile mu‘arrefeler olan Rukiye ve Hadîce bintey el-Hâc Halil nâm hatun[lar] mahzarlarında bi’l-vekâle ikrâr-ı tâm ve takrîr-i kelâm edip Mehmed Ağa Câmi‘-i şerîfi Vakfı’ndan olup mahmiye-i İslambol’da Eminönü’nde Kahve Gümrüğü altında köşede vâki‘ beyne’l-ahâlî ve’l-cîrân ma‘lûmü’l-hudûd bir bâb manav dükkânı müvekkilem mezbûre Lübâbe Hatun’un bi’l-icâreteyn tasarrufunda ve derûnunda mezbûretân Rukiye ve Hadîce hatunların babaları mezbûr el-Hâc Halil müşâhereten müste’cir iken fevt oldukda mezbûretân ile âhar kız karındaşları Afife Hatun dükkân-ı mezkûra taraflarından mezbûre Rukiye’nin oğlu Halil’i iskân ve müddet-i vâfireden beri ol dahi müşâhereten müste’cir olup lâkin müvekkilem mezbûre Lübâbe Hatun fesh-i akd-i icâre ile mezbûr Halil’i dükkân-ı mezkûrdan ihrâc murâd mezbûre Afife Hatun dahi hayatında dükkân-ı mezkûr kadîmî gedikli dükkânlardan olup derûnunda mevcûd beyne’l-hiref gedik ta‘bîr olunur ber-mûceb-i defter terâzi ve kantar ve küfe ve tabla ve sâir âlât-ı lâzıme-i ma‘lûmemi babam müteveffâ-yı mezbûr el-Hâc Halil hayatında yedinde mâlı ve ba‘de vefâtihî benim kız karındaşlarım mezbûretân Rukiye ve Hadice’ye intikāl edip dükkân-ı mezkûrun gediği mülkümüzdür deyü nizâ‘ ve mezbûretân Rukiye ve Hadîce hatunlar dahi gedik olduğunu inkâr ile keff-i yed edip bu vechile ba‘de’l-münâza‘a mezbûre Afife Hatun’un yedine verilen i‘lâm nâtık olduğu üzere dükkân-ı mezkûrun sülüsünde gedik i‘tibârıyla mezbûre Afife Hatun mutasarrıfe olmak üzere müvekkilem mezbûre Lübâbe Hatun kendiye izin ve sülüs-i dükkânı icâre-i kadîmesinin sülüsünü kendiye îcâr etmişidi el-hâletü hâzihî dükkân-ı mezkûrun sülüsânında dahi kezâlik gedik i‘tibârıyla mezbûretân Rukiye ve Hadîce Hatun’un mutasarrıfe olmak üzere müvekkilem mezbûre Lübâbe Hatun kendileri izin verip sülüsân-ı dükkânı dahi kezâlik icâre-i kadîmesinin sülüsânı ile kendilere îcâr ve teslîm eyledikde onlar dahi ber-minvâl-i muharrer istîcâr ve kabûl edip fîmâ-ba‘d dükkân-ı mezkûrun sülüsüne mezbûre Afife Hatun gedik olmak üzere mutasarrıfe olduğu gibi sülüsânında dahi gedikleri olmak üzere mezbûretân Rukiye ve Hadîce hatunlar mutasarrıfeler olup icâre-i kadîmesi müvekkilem mezbûre Lübâbe Hatun tarafına beher şehr edâ ve teslîm olundukça asla ve kat‘a ta‘arruz ve müdâhale etmemek üzere müvekkile-i mezbûre Lübâbe Hatun ta‘ahhüd eyledi dedikde mezbûretân Rukiye ve Hadîce [18a] hatunlar dahi vekîl-i mukırr-ı mezbûr Mustafa Ağa’yı kelimât-ı meşrûhasında vicâhen ve şifâhen tahkīk ve tasdîk etmeleriyle mâ-vaka‘a bi’t-taleb ketb olundu. Fî 26 Safer sene 1184. Şuhûdu’l-hâl: Feyzullah Efendi b. Abdullah, Ali b. Abdullah, Ali Çelebi b. Abdullah, Azizoğlu Mehmed.