İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 90 Hüküm no: 48 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ustası Markos ve ortağının Vâlide Fırını ile değirmendeki gedik hisselerini sattıkları Habbâz tâifesinden mahmiye-i İslambol’da Uzunçarşı başında ekmekçi olan Usta Markos v. Samuyel nâm zimmî kendi nefsinden asîl ve şerîki Abram v. Gaspar nâm zimmî tarafından husûs-ı âti’l-beyânda vekîl olduğu Cafer Beşe b. Mehmed ve Ali Berbad b. Mustafa nâm kimesneler şehâdetleriyle sâbit olmağla mersûm Usta Markos meclis-i şer‘-i şerîf-i enverde işbu bâ‘iseyi’r-rakīm Mogses v. Avanis nâm zimmî kendi tarafından asîl ve ammi Ariton v. Karabet nâm zimmî tarafından vech-i âtî üzere tasdîka vekîl-i şer‘îsi olmağla mersûm Mogses zimmî muvâcehesinde bi’l-asâle ve bi’l-vekâle ikrâr ve takrîr-i kelâm edip mahmiye-i mezbûrede Şehremîni kurbünde Vâlide Fırını demekle ma‘rûf ekmekçi fırını ve ittisâlinde vâki‘ on horoslu değirmen derûnunda mevcûd kırk re’s bargir ile sâir ber-mûceb-i defter-i müfredât âlât-ı lâzıme ve eşyâ-i ma‘lûmenin on iki sehim i‘tibârıyla sekiz sehmi bizim ve dört sehmi Vartan nâm zimmînin sâbıkā yedimizde mülk ve hakkımız olmağla ben ve şerîkim müvekkilim mezbûr Abram zimmî zikrolunan fırın ve değirmenden ber-mûceb-i i‘tibâr-ı mezkûr mâlikler olduğumuz sekiz sehim hisse-i şâyi‘amızı tarafeynden îcâb ve kabûlü hâvî şürût-ı müfside ve muvâza‘adan ârî bey‘-ı bâtt-ı sahîh-i şer‘î ve safka-i vâhide ile mersûmân Mogses ve ammi Ariton zimmîlere mütesâviyen iki bin dokuz yüz otuz beş guruşa ben ve şerîkim mezbûr Abram zimmî bey‘ ve temlîk ve teslîm eylediğimizde onlar dahi ber-vech-i muharrer iştirâ ve temellük ve tesellüm eylediklerinden sonra semeni olan meblağ-ı mezkûr iki bin dokuz yüz otuz beş guruşu mersûmân Mogses ve ammi Ariton yedllerinden bi’l-münâsafa tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ ve ıskāt ve herbirimiz âharın ibrâsını kabûl eyledik ba‘de’l-yevm mârrü’z-zikr fırın ve değirmen derûnlarında mevcûde bargirler ve bi’l-cümle sâir âlât-ı lâzıme ve eşyâ-i ma‘lûmenin i‘tibâr-ı mezkûr ile sekiz sehm-i şâyi‘leri mersûmân Mogses ve ammi Ariton zimmîlerin ale’l-iştirâki’s-seviy mülk-i sahîh ve hakk-ı sarîhleri olup kat‘a benim ve şerîkim müvekkilim mersûm Abram zimmînin alâka ve medhalimiz kalmamışdır dedikde gıbbe’t-tasdîkı’ş-şer‘î mersûm Mogses zimmî şürût-ı nizâmları üzere sayf ve şitâda altı aylık zahîre der-anbar edip hilâf-ı fermân-ı âlî ve mugāyir-i nizâm kat‘a bir türlü vaz‘ u hareket etmemek üzere asâleten ve vekâleten ta‘ahhüd etmeğin mâ-vaka‘a bi’t-taleb ketb olundu. Fî 26 Safer sene 1184. Şuhûdu’l-hâl: Ekmekçi Kethudâsı Ali Ağa, Uncular Kethudâsı Mustafa, Yiğitbaşı Molla Osman, Kanlıfırın Ustası Molla Ahmed, Zakar v. ( ), Filyos v. Avanis, Usta Vartan v. Tomas, Toma v. Kirkor, Ariton v. Agop.