İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 91 Hüküm no: 49 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Kirkor’un Ortaköy’de uncu değirmeninde olan üç sehim gedik hissesini sattığı Uncu tâifesinden olup medîne-i Galata’ya muzâfe Ortaköy kasabasında mütemekkin Kirkor v. ( ) nâm zimmî meclis-i şer‘-i şerîf-i enverde işbu bâ‘isü’r-rakīm Gaspar v. Karabet nâm zimmî muvâcehesinde ikrâr-ı tâm ve takrîr-i kelâm edip mârrü’z-zikr Ortaköy’de iskele başında vâki‘ beyne’l-ahâlî ve’l-cîrân ma‘lûmü’l-hudûd ve’l-müştemilât üç horoslu uncu değirmeni derûnunda mevcûde on iki re’s bargir ile sâir ber-mûceb-i defter âlât-ı lâzıme ve eşyâ-i ma‘lûmenin on iki sehim i‘tibârıyla dört sehmi hazır bi’l-meclis Hamparsom v. Haçuk zimmînin ve iki sehmi Kerih v. Kirkor zimmînin ve altı sehmi benim müşâ‘an yedimizde mülk ve hakkımız olmağla ben zikrolunan değirmenden ber-mûceb-i i‘tibâr-ı mezkûr mâlik olduğum altı sehimden üç sehime isâbet eden üç re’s bargiri âlât-ı lâzımeleriyle tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mersûm Gaspar zimmîye altı yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr altı yüz guruşu mersûm Gaspar zimmî yedinden tamamen ve kâmilen ahz u kabz edip bey‘-ı mezkûrun gabn ve tağrîrine ve istifâ-i semenine ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm sâlifü’z-zikr uncu değirmeninin i‘tibâr-ı mezkûr ile üç sehmine isâbet eden üç re’s bargir âlât-ı lâzımeleriyle mersûm Gaspar zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Safer sene 1184. Şuhûdu’l-hâl: Ekmekçiler Kethudâsı Ali Ağa, Uncular Kethudâsı Mustafa Ağa, Yiğitbaşı Molla Osman, Kanlıfırın Ustası Molla Ahmed, Ariton v. Agop, Filyos v. Avanis, Usta Vartan v. Tomas.