İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 92 Hüküm no: 50 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un Tatarpazarı’nda tasarrufunda bulunan pirinç ekimi hakkını devrettiği Mahmiye-i İslambol’da Topkapısı civârında Nakkāş Paşa Sarayı kurbünde sâkine ve zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan Zeyneb bt. Hasan nâm hatun meclis-i şer‘-i şerîf-i enverde Tatarpazarcığı voyvodası fahrü’l-akrân işbu bâ‘isü’l-kitâb Hâfız Ahmed Ağa b. İbrahim tarafından vech-i âtî üzere vekîl olduğu İsmail Ağa b. el-Hâc Ahmed ve Hüseyin Ağa b. Hasan şehâdetleriyle sâbit olan Hâfız el-Hâc Mustafa Ağa b. el-Hâc Ali mahzarında ikrâr-ı tâm ve takrîr-i kelâm edip Filibe çeltiği enhârından Tatarpazarı’nda vâki‘ İbrahim Paşa Nehri’nde sekiz aded tohumlara cânib-i mîrî için senevî üç yüz yirmi keyl pirinç maktû‘ ile Zeyneb bt. Âişe ismiyle bâ-berât-ı âlîşân mutasarrıfe olduğum zikrolunan sekiz aded tohumlarımı kendi hüsn-i rızâ ve tayyib-i hatırıyla müvekkil-i mûmâ-ileyh Hâfız Ahmed Ağa’ya dokuz yüz guruş bedel mukābili ferâğ ve bi’l-külliye kasr-ı yed edip berat ve tezkiresini vekîl-i merkūm yedine teslîm eylediğimde ol dahi bedel-i mezkûr dokuz yüz guruşu müvekkil-i mûmâ-ileyh mâlından bi’l-vekâle bana def‘ u teslîm ve istihlâk ile emredip ben dahi ber-minvâl-i muharrer yedinden tamamen ahz u kabz ve umûruma sarfla istihlâk eylediğimden sonra vech-i meşrûh [üzere] ferâğ ve kasr-ı yed eylediğim zikrolunan sekiz aded tohumlara ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan müvekkil-i [19a] mûmâ-ileyh bedel-i ferâğ nâmıyla bana medfû‘u olan meblağ-ı müstehlek-i mezkûr dokuz yüz guruşa müte‘allika âmme-i da‘vâdan vekâleten benim zimmetimi ibrâ ve ıskāt eyledi dedikde gıbbe’t-tasdîkı’l-mu‘teberi’l-mer‘î mukırre-i mezbûre Zeyneb Hatun yine meclis-i şer‘de İsmail Ağa b. el-Hâc Ahmed mahzarında iâde-i kelâm edip bâlâda zikrolunduğu vech üzere sâlifü’l-beyân sekiz aded tohumları müvekkil-i mûmâ-ileyh Hâfız Ahmed Ağa’ya benim ferâğ ve kasr-ı yedimi mahâllinde takrîre ve bi’l-cümle husûs-ı mezkûra mütevakkıf olduğu umûrun küllîsine tarafından mezbûr İsmail Ağa’yı vekîl ve nâib-i menâb nasb ü ta‘yîn eyledim dedikde ol dahi vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 5 Rebî‘ülevvel sene 1184. Şuhûdu’l-hâl: Hamza Beşe b. Kasım, İbrahim b. Ali, Umûr Ağa b. Yakub, Tatarpazarcıklı Ahmed Usta.