İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 93 Hüküm no: 51 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Yazıcı’nın terekesi hususunda eşinin diğer vârislerin zimmetini ibra ettiği Mahmiye-i İslambol’da Davudpaşa mahallesi ahâlîsinden olup Yalakâbad kazâsına tâbi‘ Belçiçek İskelesi’nden sefîne ile gelirken bi-kazâillâhi te‘âlâ garîkan vefât eden Osman Yazıcı b. İbrahim’in verâseti zevcesi Emetullah bt. Ahmed nâm hatun ile vâlidesi Alîme bt. İsa nâm hatuna ve li-ebeveyn er karındaşı Mehmed Çelebi nâm kimesne ve Ürgüb kasabasında sâkineler li-ebeveyn kız karındaşları Ümmühani ve Âişe ve Hadîce nâm hatunlara münhasıra ve mes’ele-i mirasları altmış sehim i‘tibârıyla on beş sehmi zevce-i mezbûre Emetullah Hatun’a ve on sehmi anası mezbûre Alîme Hatun’a ve on dört sehmi karındaşı mezbûr Mehmed Çelebi’ye ve yedişer sehmi kız karındaşları mezbûrât Ümmühani ve Âişe ve Hadice’den herbirine isâbeti tahakkukundan sonra zâtı ta‘rîf-i şer‘î ile mu‘arrefe olan zevce-i mezbûre Emetullah Hatun meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘u’l-yed olan işbu bâ‘isü’l-kitâb mezbûr Mehmed Çelebi mahzarında ikrâr-ı tâm ve takrîr-i kelâm edip zevcim müteveffâ-yı mezbûrun mâlı olup mahmiye-i mezbûrede Lanka Yenikapısı hâricinde vâki‘ kirâ ile tasarrufunda olan bir bâb mahzen derûnunda mevcûd beyne’l-hiref gedik ta‘bîr olunur ber-mûceb-i defter âlât-ı lâzıme-i ma‘lûmesi kıymeti iki yüz elli guruş ve benim yedimde olup mezbûr Mehmed Çelebi’ye teslîm eylediğim bir kırmızı çuka biniş ve bir kutnî anteri ve bir şâlî cübbe ve bir çakşır ve bir kavuk ve bir destâr ve bir kırmızı çukaya kaplı cübbe kürk ve bir gömlek ve bir don ve iki uçkur kıymetleri otuz iki guruş ve mahzen-i mezkûrda hâsıl bir aylık fâiz altmış guruş ve kasaba-i mezbûrede vâki‘ ma‘lûmü’l-hudûd ve’l-müştemilât bir bâb mülk menzil kıymeti yüz guruşu ve yine kasaba-i mezbûrede Gökkaya nâm mahâlde vâki‘ bir kıt‘a kürûmu mülk bağ kıymeti yirmi sekiz guruş ki min-haysü’l-mecmû‘ dört yüz yetmiş guruşdan zevcim müteveffâ-yı mezbûr zimmetinde ma‘kūdün-aleyh otuz guruş mehr-i müeccelim fürû-nihâde olunduka bâkī kalan dört yüz kırk guruşdan i‘tibâr-ı mezkûr ile rub‘ hisseme isâbet eden yüz on guruş ki cem‘an yüz kırk guruşu zevcim müteveffâ-yı mezbûrun terekesinden olmak üzere karındaşı mezbûr Mehmed Çelebi bana def‘ u teslîm eyledikde ben dahi yedinden tamamen ahz u kabz edip ol vechile zevcim müteveffâ-yı mezbûrun terekesinden mehr-i mezkûrumu ve rub‘ hisse[mi] tamamen ve kâmilen ahz u istifâ eyledim min-ba‘d bir akçe ve bir habbe hakkım [19b] bâkī kalmamağla zikrolunan mahzen gediği ta‘bîr olunur âlât-ı lâzımeye ve fâiz ve eşyâ-i muharrere-i mezkûreye ve sâlifü’z-zikr mülk menzil ve bağa ve kıymetlerine ve mehr-i mezkûruma ve’l-hâsıl zevcim müteveffâ-yı mezbûrun cüz’î ve küllî bi’l-cümle ism-i mâl ıtlâk olunur cemî‘ terekesine ve hukūk-ı meberrâta müte‘allika âmme-i de‘âvî ve kâffe-i mutâlebâtdan mezbûr Mehmed Çelebi ile vâlidesi mezbûre Alîme ve kız karındaşları mezbûrât Ümmühani ve Âişe ve Hadice’den herbirinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip ol dahi ibrâyı kabûl eyledi min-ba‘d kendi ile asla ve kat‘a ve husûs-ı mezkûra müte‘allik da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Safer sene 1184. Şuhûdu’l-hâl: Kuzât-ı kirâmdan Kethudâ Ali Çelebi b. ( ) efendi-i gulâm, Kanlıfırın Ustası Molla Ahmed b. Hüseyin, Pazarbaşı Vekîli es-Seyyid el-Hâc Mehmed Ağa b. Hüseyin, el-Hâc Mehmed b. Abdüllatif, Osman Yazıcı b. Ali.