İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 94 Hüküm no: 52 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un mülk menzilini sattığı Mahmiye-i İslambol’da Murad Paşa-yı atîk mahallesinde sâkine ve zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan Rukiye Hatun bt. Ali meclis-i şer‘-i şerîf-i enverde işbu bâ‘iseyi’l-kitâb Kayseriyeli Güpgüpzâde es-Seyyid Ömer Ağa b. Mehmed kendi nefsinden asîl ve zevcesi Şerife Emetullah Hatun bt. Mehmed tarafından vech-i âtî üzere vekîl-i şer‘îsi olmağla merkūm es-Seyyid Ömer Ağa mahzarında ikrâr-ı tâm ve takrîr-i kelâm edip bâ-hüccet-i şer‘iye yedimde mülküm olup mahalle-i mezbûrede vâki‘ bir tarafdan Sarrâcbaşı İsmail Ağa zevcesi Hadîce Hatun menzili ve bir tarafdan ba‘zen el-Hâc Ömer ve ba‘zen Tütüncü Halil Ağa menzilleri ve bir tarafdan Yorganî Hüseyin Çelebi menzili ve bir tarafdan tarîk-i âm ile mahdûd hâriciyede fevkānî bir bâb oda ve dehliz ve kenîf ve âbdesthâne ve tahtânî iki bâb oda ve ahır ve havlu ve musluklu su mahzeni ve dâhiliyede ulyâda üç bâb oda ve sofa ve bir mikdâr dehliz ve âbdesthâne ve kenîf ve vüstâda üç bâb oda ve dehliz ve kenîf ve âbdesthâne ve tahte’s-semâ ve süflâda bir bâb oda ve kiler ve mahtab ve kömürlük ve matbah ve hamam ve câmekân odası ve kuyu mahzen ve su kuyusu ve kenîf ve bir mikdâr havlu ve bahçe ve etrâf-ı erba‘adan taş duvarları müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile zevcân-ı merkūmân es-Seyyid Ömer Ağa ve Şerife Emetullah Hatun’a mütesâviyen dört bin guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm eylediklerinden sonra semeni olan meblağ-ı mezbûr dört bin guruşu yedlerinden tamamen ve kâmilen ahz u kabz edip bey‘-ı mezbûrun gabn ve tağrîrine ve istifâ-i semene müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt ve herbirimiz âharın ibrâsını kabûl eyledik ba‘de’l-yevm menzil-i mahdûd-ı mezkûr cemî‘ müştemilâtıyla zevcân-ı mezbûrân es-Seyyid Ömer Ağa ve Şerife Emetullah Hatun’un ale’l-iştirâki’s-seviy [20a] mülk-i müşterâları ve hakk-ı sırfları olup keyfe mâ yeşân ve yahtârân mutasarrıflar olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Rebî‘ülevvel sene 1184. Şuhûdu’l-hâl: Mehmed Bey b. Hasan Efendi, Şeyh es-Seyyid Mehmed b. Hamza, Hâfız es-Seyyid Molla Mehmed Söylemezzâde, Kılıçcızâde İbrahim Ağa, Rüstem b. Abdullah, es-Seyyid Ömer Efendi b. Hasan Diyarbekirli.