İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 95 Hüküm no: 53 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıblelizâde Osman Beyefendi’nin tasarrufunda bulunan Filibe’deki on dokuz adet çeltik tohumlarını ve yerini bedeli karşılığında devrettiği Mahmiye-i İslambol’da Bahçekapısı kurbünde Hobyar mahallesi a‘yânından ve hâcegân-ı Dîvân-ı Hümâyûn’dan mefharü erbâbü’t-tahrîr Kıblelizâde Osman Beyefendi b. Mehmed Bey meclis-i şer‘-i şerîf-i enverde yine hâcegân-ı Dîvân-ı Hümâyûn’dan umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām sahibü hâze’l-kitâb es-Seyyid Mehmed Efendi b. Halil Efendi tarafından vech-i âtî üzere vekîl olduğu es-Seyyid Süleyman Ağa b. Ali ve Abdülkadir Ağa b. Ali şehâdetleriyle sâbit olan el-Hâc Mustafa Ağa b. el-Hâc Mehmed mahzarında ikrâr-ı tâm ve takrîr-i kelâm edip Filibe çeltiği enhârından dört kıt‘a berat-ı âlîşân ile mutasarrıf olduğum on dokuz aded çeltik tohumlarım ile ber-mûceb-i berat-ı âlîşân mutasarrıf olduğum Arzlar Nehri’nin sülüs hissesini kendi hüsn-i rızâ ve tayyib-i hâtırımla müvekkil-i mûmâ-ileyh es-Seyyid Mehmed Efendi’ye bedel-i ma‘lûm mukābili ferâğ ve bi’l-külliye kasr-ı yed edip zikrolunan beratları ile tezkiresini işbu vekîl-i merkūm el-Hâc Mustafa Ağa yedine teslîm eylediğimde ol dahi ahz u kabz eyledikden sonra bedel-i mezkûru müvekkil-i mûmâ-ileyh bana def‘ u teslîm ve istihlâk ile emredip ben dahi ber-minvâl-i muharrer tamamen ahz u kabz ve umûruma sarfla istihlâk eylediğimden sonra vech-i meşrûh üzere ferâğ ve kasr-ı yed eylediğim sâlifü’l-beyân on dokuz aded çeltik tohumlarına ve sülüs nehr-i mezkûra ve bi’l-cümle husûs-ı merkūma müte‘allika âmme-i de‘âvî ve kâffe-i mutâlebâtdan ben müvekkil-i mûmâ-ileyh es-Seyyid Mehmed Efendi’yi ibrâ-i âmm-ı kātı‘u’n-nizâ‘la ibrâ ve ıskāt eylediğimde vekîl-i merkūm dahi bedel-i ferâğ nâmıyla bana medfû‘u olan bedel-i müstehleke-i mezkûra müte‘allika âmme-i da‘vâdan vekâleten benim zimmetimi ibrâ ve ıskāt eyledi min-ba‘d zikrolunan tohumlarda ve nehr-i mezkûr[un] sülüsünde kat‘a benim alâka ve medhalim kalmayıp müvekkil-i mûmâ-ileyh es-Seyyid Mehmed Efendi’nin dâhil-i havza-i tasarrufu olmuşdur dedikde gıbbe’t-tasdîkı’l-mu‘teberi’l-mer‘î mâ-vaka‘a bi’t-taleb ketb olundu. Fî 11 Rebî‘ülevvel sene 1184. Şuhûdu’l-hâl: Ali Beyefendi b. el-merhûm Osman Beyefendi, es-Seyyid Hüseyin Efendi b. Ali, İbrahim Çavuş b. Abdullah, Keşfî Ahmed b. Abdullah, Sâbıkā Bostancıbaşı Ömer Ağa, Ahmed Ağa b. ( ) Edir[ne] bostanbaşı