İstanbul Mahkemesi 33 Numaralı Sicil (H. 1183-1185 / M. 1769-1770) cilt: 77, sayfa: 96 Hüküm no: 54 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımzâde İbrahim Ağa’nın Kantarcılar çarşısındaki yarım fırın gediği hissesini sattığı Mahmiye-i İslambol’da Timurhan mahallesinde sâkin el-Hâc Kasımzâde es-Seyyid el-Hâc İbrahim Ağa b. es-Seyyid el-Hâc Ali meclis-i şer‘-i şerîf-i enverde ekmekçi tâifesinden işbu bâ‘iseyi’r-rakīm Kirkor v. Şehbaz ve Agop v. Bedros nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Kantarcılar sûkunda vâki‘ beyne’l-ahâlî ma‘lûmü’l-hudûd bir bâb ekmekçi fırını derûnunda mevcûde beyne’l-hiref gedik ta‘bîr olunur ber-mûceb-i defter-i müfredât eşyâ-i ma‘lûme ve âlât-ı lâzımenin nısfları benim ve nısf-ı [20b] âharları mersûm Kirkor’un müşâ‘an yedimizde mâlımız ve mülkümüz olmağla ben zikrolunan eşyâ ve âlât-ı lâzımeden mâlik olduğum nısf hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-ı kat‘î ve safka-i vâhide ile mersûm Kirkor ve Agop zimmîlere üc yüz elli guruşa bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm eylediklerinden sonra semeni olan meblağ-ı mezbûr üç yüz elli guruşu mersûmân Kirkor ve Agop zimmîlere yedlerinden tamamen ve kâmilen ahz u kabz edip bey‘-ı mezkûrun tağrîr ve gabnine ve istifâ-i semene ve bi’l-cümle gedik husûsuna müte‘allika âmme-i da‘vâdan herbirimiz âharın zimmetini ibrâ-yı âm ile ibrâ ve ıskāt ve herbirimiz âharın ibrâsını kabûl eyledik fîmâ-ba‘d sâlifü’z-zikr ekmekçi fırınının gediği ta‘bîr olunur eşyâ-i ma‘lûme ve bi’l-cümle sâir âlât-ı lâzımenin rub‘-ı şâyi‘leri mersûm Agop zimmînin ve selâse-i erbâ‘-ı şâyi‘leri mersûm Kirkor zimmînin mülk-i sahîh ve hakk-ı sarîhleri olup eşyâsında ve gediğinde kat‘a benim alâka ve medhalim kalmamışdır diledikleri gibi mutasarrıflar olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 Rebî‘ülevvel sene [1]184. Şuhûdu’l-hâl: Etmekci Kethudâsı Ali Ağa, Yiğitbaşı Molla Osman, Salıcı Molla Osman, es-Seyyid el-Hâc Ebûbekir b. ( ) Ağa, Kanlıfırın Ustası Ahmed Ağa, Sofularlı Molla Mustafa.